人行降準未必能夠近火 內房輪流配股抽水自救
美股隔晚報復式反彈，道指尤期升得急，進帳646點；標指跟納指分別升53點及139點，而中概股亦見反彈，加上人行噚日黃昏左右宣布降準，港股噚日創咗14個月新低後回穩，半日反彈逾300點。恒指高開355點，報23704，早段曾升385點，見23735半日高位，但A股走弱，港股升幅收窄至163點，見23512半日低位。不過內地進出口增長好過預期，中國海關總署公布，中國11月以美元計，出口按年增長22%，高於市場預期升20.3%；進口按年增長31.7%，亦高於市場預期增長21.5%。貿易順差717.1億美元，按年減少3.4%；港股重拾動力，恒指半日收市升340點，報23690；國企指數報8405，升131點；恒科指升123點，報5851點。美中不足係半日成交不足800億元，未能配合升勢。
藍籌股普遍做好，大笨象(00005)半日升0.6%，友邦(01299)半日升1.2%；港交所(00388)繼續做好，半日再升近3%。半日表現較出色要數碧桂園(06098)，半日升7.1%，碧桂園呢一系，喺內房債務問題爆到七彩之際，。科網股反彈，整體急彈，當中一直表現最弱嘅阿里(09988)半日升近一成，但一日阿里唔上返130樓上，都難言轉勢。中概股彈得多啲，百度(09888)半日彈7.1%，但京東(09618)就未有跟大市反彈，反而下試300樓下，暫時睇300有冇支持。其他騰訊(00700)跟美團(03690)半日分別升1.9%及2.3%，表現平平，亦因為佢哋升得唔夠落力，限制咗大市半日幅。
人行降準放水，內房股反彈，愈係財政問題較緊掘嘅內房，今日愈彈得多，反而財政較穩健嘅今日就彈得少啲，都係憧憬銀行放水幫有財政問題嘅內房渡過難關，受惠得多彈得多都合理。不過個別內房股繼續選擇配股集資嚟自救，世茂(00813)及龍光集團(03380)配股抽水，半日逆市跌0.8%及9.4%。富力(02777)就選擇出售資產予黑石，中午抽高6.4%。噚日阿Man講過恒大(03333)表內嘅債務問題當然嚴重，至怕係表外未知嘅債唔知有幾大條數，呢個時候集團竟然設立風險化解委員會，但呢個會由許家印擔住主席，恒 大搞到今時今日咁大鑊，正正係許家印之前無好好控制風險，依家化解風險又係由佢主理，似乎有啲搞笑。阿Man噚日話咗內房股同內銀股都要避之則吉，除咗係內房企業表外債務問題屬未知數，至怕係唔知幾時，邊間內房企業忽然低價都要批股抽水，萬一搞著龍光批完股跌一成，真係死得無辜。
生物科技股反彈，噚日阿Man又建議博一博龍頭藥明生物(02269)，雖然半日彈得2.5%唔算多，但勝在夠穩陣，夜晚瞓得安落，中線要重返紅底股問題不大，有貨都係睇住95同90兩個位。其他生科股反彈由超過3%至接近半成不等，講真新一批藥品名冊都叫符合預期，噚日急跌實在有啲無厘頭，龍頭企業趁回調收集作中線投資應無乜點錯。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。