任何時候博反彈優先揀行業龍頭
通脹殺到埋身，美國最新數據顯示，美國10月消費物價指數(CPI)按年升6.2%，高於預期嘅5.9%，為自1990年11月以嚟最大升幅；按月升0.9%，亦高於預期0.6%。扣除食品跟能源嘅核心CPI按年漲4.6%，按月升0.6%，亦分別高於預期4.3%及0.4%。由於數據反映通脹升溫，美國債息急升，10年期美國國債孳息率周三升逾12個基點，至1.575厘。隔晚美股繼續腳仔軟，三大指數都要跌，納指跌1.6%跌勢較顯著。
恒指低開140點，最多跌159點，見24836點半日低位，之後反彈倒升升119點，見25115點半日高位，但二萬五得而復失，暫時仍受制二萬五關口，半日反覆偏軟，又復挫過百點。恒指中午收報24958點，跌37點； 國企指數報8907點，跌3點。恒科指跌3點，報6346點。
藍籌個別發展，騰訊(00700)季績麻麻，唔少大行都調低其目標價，股價半日跌近3%，不過睇圖表就450元應該出咗個雙底，加上公司喺投資電話會議上強調未來發展及增長亮點係元宇宙，呢一份業績跌3%已經算好畀面。ATMX只有美團(03690)靠穩，微升，阿里(09988)半日跌1.7%，小米(01810)20元水平有不俗支持，但就硬係升唔起。相反信義玻璃(00868)半日升6.2%，係表現最好藍籌股。領展(00823)公布業績後，中期派送增一成三，帶動股價半日升2.7%。
恒大(03333)財政問題一日未搞掂，又有其他內房股出現債務違約危機，阿爺正考慮放寛規則，搬一搬龍門，令陷入困境嘅地產商出售資產套現，以免出現大量違約，內地有消息指瀋陽或放寛限售。另一方面，有傳聞指恒大債券持有人喺寛限期前收到利息，恒大半日升5.5%，其他內房股今日逆市反彈，普遍升幅超過3%。
食品股呢兩日表現唔錯，統一(00220)公布首九個月子公司盈利情況後，獲麥格理升評級至「跑贏大市」，半日飆12.1%；康師傅(00322)創逾三年高，半日升2.8%。剛剛畀阿爺發炮嘅乳業股，龍頭蒙牛(02319)半日彈2.4%，噚日阿Man講咗蒙牛只要守到保力加通道底，係可以撈嚟博反彈，今日雖然彈得唔算多，但總算有交代。咁啱大摩出咗報告，指其股價可以喺30日內跑贏同業，並指近期市場對內地乳製品行業溢價趨勢擔憂反應過度，至少阿Man噚日嘅諗去都無錯，要博反彈，幾時都係龍頭行先。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。