信義光能績佳護航 守配股價後維持升勢
聮儲局一預期維持利率不變，投資者繼續觀望新一輪紓困方案喺國會嘅談判進展，美股隔晚窄幅上落，道指跌44點，標指跟納指上升，納指再升63點，連續兩個交易日創收市新高。聯儲局結束今年最後一次議息會議，宣布維持聯邦基金利率介乎0至0.25厘，符合預期，並承諾繼續買債直至就業市場全面復甦。主席鮑爺警告喺疫情下經濟前景面臨重大挑戰及不確定性，預期聯儲局喺相當長嘅一段時期內會繼續幫助經濟發展。
過去幾個月國會就刺激經濟方案談判陷入僵局，但最近談判開始見曙光，參院多數黨派領袖麥康奈爾表示，如果國會唔達成協議就唔放假，市場憧憬喺聖誕節長假前，新一輪刺激經濟方案可達成協議。不過喺方案落實前，美股表現仍然牛皮。至於港股上半場好淡爭持，但成功收復10日線(26460)
恒指高開148點報26608，已經係半日高位，其後曾倒跌69點，見26390點半日低位，不過A股止跌回升，港股亦由跟住拗腰升過百點，但之後升幅再度收窄。最終恒指半日收報26481，升21點；國企指數升28點，報10490；恒生科技指數升75點，收8221。半日大市成交只有656.06億元，相信愈接近聖誕節長假，交投會更趨淡靜。
藍籌股個別發展，友邦(01299)、大笨象(00005)跟建行(00939)等傳統金融股下跌，資金又從傳統股流向新經濟股，騰訊(00700)、阿里(09988)及美團(03690)則繼續反彈。其他科網股個別發展，年尾流流唔少缸邊友都提早收爐，加上新經濟股今年累積巨大升幅，呢兩日就算有反彈咪由得佢，炒少幾日唔會死，反正今年大豐收，唔使連最後幾日汁都要撈埋。
有消息指內地抗癌藥PD-1降價低過預期，近日被醫保創新藥談判困擾嘅生化藥股，今日均見反彈，之前阿Man睇好嘅信達生物(01801)連日回升，半日再升5.8%，已逼近前高位，有機會再挑戰新高。但另一百濟神州(06160)表現相距甚遠，雖然早前喺138元水平營造小圓底，但呢兩日反彈回升力度有限，暫時股價仍處於多條移動平均線之下。其他生化藥股均見有資金追捧，不過阿Man食少多教訓，堅決唔高追。
至於早前威威嘅新能源股，噚日午後走勢急轉直下，應該係有春江鴨收到風，龍頭之一嘅信義光能(00968)趁盈喜刺激股價向上乘機批股集資，唔少光伏股尋日下半場已腳軟，今日沽壓持續，唔少光伏股閒閒地跌3%或以上。不過信義光能終紿有強勁業績護航，股價早段跌5.3%但守穩配股價13元，半日倒升0.1%，唔排除下半場升幅可擴大。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。