假期前夕乏成交 港股反彈有難度
話咗疫情告急同聯儲局收水，只係解釋美股之前回調嘅理由，實際股市都係講資金流向，當避險情緒略為放鬆，資金又回流美股，美股反彈易過借火，隔晚三大指數齊彈，納指升幅更超過2%。可惜假期前夕，缸邊友意興闌珊，本來港股就係弱底，今朝高開重上23000後，半日升幅收窄，成交額只得542億元。
恒指今早高開249點，報23221，最多曾升287點，見半日高位23258，但成交未能配合，未有足夠買盤跟進，大市升幅縮至61點，見23033半日低位。恒指半日收報23047，升75點；國企指數報8178，升36點；科指半日升43點，午收5655。
藍籌股個別發展，大笨象(00005)跟友邦(01299)半日分別升0.1%及0.4%，體品股反彈，李寧(02331)跟安踏(02020)半日分別彈4.7%及3.5%，前者係半日升最多藍籌股。但內險股表現麻麻，國壽(02628)跟平保(02318)半日分別跌0.2%及1.4%。
科網股整表現有改善，ATMXJ之中，京東(09618)半日彈近2%表現最好，美團(03690)半日彈1%，阿里(09988)跟騰訊(00700)半日升不足1%。其他科網股均見反彈，主要係中概股喺美股嗰邊有支持兼反彈，喺港股呢邊都要爭番啖氣。
話咗內房物管股反彈千祈唔好多手追，今日呢兩個板塊又走弱，彈嗰一日半日，都扭轉唔到長期弱勢。中海外(00688)跟潤地(01109)半日跌2%，係表現最差藍籌股，人彈佢唔彈。其他內房股跟物管股均見逆市下跌，跌幅由0.6%至半成不等。整個板塊繼續無運行，有貨好趁反彈減磅，無貨眼看手勿動。生科股半日逆市走軟，龍頭藥明生物(02269)半日跌2%，其他生科股閒閒地跌2%或以上。
12月餘下嘅交易日唔多，下個星期只得三個半交易日，加埋明日同平安夜半個交易日，相信市況會維持淡靜，呢段時間都係少做少錯，待來年開局再重新配置，暫時大市希望守得住23000水平，否則喺缺乏成交支撐下，稍有利淡消息傳出，大市有機會再試低位。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。