債息高企對高增長股影響逐步淡化
聯儲局會議完結，美國保持寛鬆貨幣政策嘅同時，提高通脹目標，令美國10年期債息再抽升至1.7厘水平，拖累高增長股下跌。而法國巴黎等地封城一個月，令市場再擔心疫情不穩，隔晚美股三大指收下跌。港股呢個星期臨尾香，彈咗四個交易日今日畀美股拖累下再度走軟，又再失守二萬九大關兼且盡失10日、20日及50日三條移動平均線。
恒指低開247點報29158，跌幅一度收窄至134點，高見29271，但沽壓再現，大市跌幅擴大，二萬九關失守，最多跌484點，見28921半日低位。恒指半日報收28950，跌454點；國企指數半日報收11274，跌195點；恒生科指收造8488，跌187點。幸而半日跌市未見成交放量，半日成交額859.34億元。
藍籌股普遍下跌，重磅科技股ATMX，只有小米(01810)逆市上升1.1%，有傳聞指小米正推動製造電動車事項，最快於一至兩個月內立項，消息一度刺激股價重上27元水平，但其後有消息指公司對此不願置評，又係另一個狼來了故事。騰訊(00700)、美團(03690)跟阿里(09988)分別跌2%、3.7%及0.7%，反映市場已開始接受較高債息水平，債息今次由1.6厘升至1.7厘，已唔見科技股單日跌5%以上，甚至一成嘅雙位數跌幅。
表現最嘅藍籌係長實(01113)，超人即係超人，將資產注入長實，不僅為股東創造更大價值，同時透過今次交易以極短時間增持股份，公司又承諾增加派息，增持後股息又落返自己個袋，其他小股東亦收多咗息，皆大歡喜，雙贏方案，市場用真白金銀入場掃貨表示滿意是次交易。
唔係阿Man睇死石油股，油價無啦啦急跌，創9個月以嚟最大單日跌幅，石油股全線受壓，中海油(00883)已四連跌，半日再挫4.7%；中石油(00857)跟中石化(00386)分別跌5.3%及3.7%，其他油服股同樣下跌。話咗石油股難炒，呢期要玩舊經濟股都唔揀呢個板塊。反而對油價敏感嘅航空股仲有得諗，低位反彈咗唔少，但多國喺民眾陸續接種疫苗下，有意研究推出疫苗護照，方便通關出行，相信當疫情持續緩和下，疫苗護照有助推動旅遊及商務飛行，暫時可以將航空股列入觀察名單。
不過今日又係星期五，避免承受周末風險，今日都係少做少錯。反正個市午後都唔會有乜嘢起色，索性熄機睇少陣，趁外面天氣唔錯，出去食個靚靚下午茶，戶外走走，好過對住個市滿江紅。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。