優質科企進行整改 日後有序發展更有利
隔晚美股表現牛皮，市場正等待聯儲局議息會議，會否為今後貨幣及利率政策提供更清晰指引。至於港股則半日繼續喺二萬九水平爭持。恒指高開50點，開市後倒跌54點，見28887點半日低位，跌穿十日線(28933)後回穩，倒升126點，見29067點半日高位，可借未能守穩兩萬九之上，升幅收窄。恒指中午報28978點，升36；國企指數報10984點，升1點；科指跌9點，報8507點。半日成交額不足700億元，留意明日北水開始放五一假期，屆時成交可能再縮水。
大笨象(00005)業績好過預期，雖然無季息派，但早於2月份已事先張揚，無礙股價向上，不過高開3%升幅又縮水，始終48至50元阻力大，今次份業績唔足以令到股價可突破沉重阻力。比較特別嘅係有消息指中央正調查阿里(09988)旗下螞蟻集團，去年申請上市時，點解可以咁短時間通過重重關卡，調查範圍範圍包括創辦人馬雲與相關人員嘅關係、中國證監會及上海監管機構嘅上市準則，以及一系列國有資本何以決定認購螞蟻等等。更甚者，據報馬雲喺螞蟻完成整改之前不得離開中國。螞蟻集團去年8月底提交上市申請，原定11月初上市，但臨門一腳卻因為內地監管部門介入，要求螞蟻進行整改，令上市計劃告吹，全世界都大跌眼鏡。雖然傳出呢個消息，但阿里股價半日不跌反升，半日進帳近2%，重上230元水平。
阿里跟美團(03690)近日頻頻被阿爺「招呼」，前者已被罰，旗下螞蟻再遭調查，而美團上月被稍稍罰款過百萬後，呢兩日又再被立案調查，但股價竟然未見大跌，阿里被罰後，股價更回穩向好。其實自去年11月阿爺刹停螞蟻上市後，並於今年對多間科網巨企展開反壟斷調查，已令呢個板塊嘅股份如洩氣波波，股價自高位大幅回落，閒閒地回三四五六成，好明顯係阿爺為免科網泡沫愈泵愈大，決心要自己擠壓泡沫，阻止相關資產泡沫瘋狂發酵。
而阿爺咁做亦相當正路，皆因中美金融戰展開後，美國一直逼使中國進一步開放金融市場，而中國已落實容許外資可獨資擁有金融企業，去年重磅科網股更成為吸金池，炒風旺盛。直至螞蟻上市更將科技炒風推上巔峰，為免外資進入後再引發走資潮，甚至引發內部地股票市場撤資效應，阿爺刹停螞蟻上市，目的係為免快車高速撞毁，搞到「車毀人亡」。
而中港兩地股市自年初高位回落，並限制熱錢流入速度，資產價格回落至更合理水平，更能確保金融與科技兩大戰略產業未來發展有序，總好過失控發展形成經濟爆破嘅計時炸彈。如果明白呢個道理，只要係優質嘅科網巨企，如今股價已回落至合理水平，其實係長線投資收集嘅好機會。至於小米(01810)半日跌咗5.1%，係因為市場關注印度疫情嚴峻及對手OPPO籌備造車。阿Man認為呢啲都係小米股價跌咗搵嚟解釋嘅借口，反而阿Man更關心係小米可能缺芯嘅問題，喺全球芯片供應短缺下，小米一旦欠缺芯片儲備，或嚴重影響其出貨量，呢個先係小米目前面對嘅最大風險。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。