入場博反彈先有心理準備再被割韭菜
美股走勢愈見反覆，但人家反覆得嚟，保持強勢，即使市場已有準備美股隨時會有大調整，但美股就係持續水浸。睇返聯儲局隔夜逆回購(O/N RRP)周三(18日)單日使用額達到歷來最多嘅11156億美元，已經連續6個交易日超越1萬億美元，反映金融體系流動性嚴重過剩，根本再無必要再買債放水。所以市場已預咗聯儲局喺今年餘下時間，隨時停止買債，並預期提早至明年底加息。咁嘅情況下，帶動美元持續做好，美匯指數已升至93.5年內高位，並擺脫2020年3月向下伸延嘅下降通道頂線，完全扭弱為強，若然美匯指數持續向上，港股只有更大向下壓力。
唔單止美元強勢不利港股，中央持續對各行各業進行監管，A股半日跌1.6%，但港股就跌得勁過人，半日跌逾2%，恒指盤中更曾挫逾700點。恒指低開75點，跌幅曾略為收窄至71點，見25244點半日高位，但再失25200水平後，跌勢加劇，一度跌734點，見24581點半日低位，創去年11月2日以嚟新低。恒指中午報收24739點，跌576點；國指則跌209點，創16個月新低，報收8707點；恒科指低處未算低，半日跌215點，報5828點。半日成交額增至1117.78億元，反映沽壓唔嘢少。
資金流公用股避險，煤氣(00003)跟中電(00002)半日升逾1%，萬洲(00288)亦係少數逆市上升股份，父子不和令股價連續兩日急跌逾一成後，今日逆市反彈2.3%。藥明生物(02269)半日跌逾一成，藍籌股單日跌一成真係無乜幾可，主要係官媒關注線上處方可靠度，令整個醫藥板塊急跌。不過藥明生物跌到去100蚊邊，已經接近50周線及250日線，100蚊邊嘅藥明生物博反彈有得諗，用5%即95元作止蝕，博佢上返110至120元，有一定值博率。其他生物科技股跌勢顯啫，發咗盈喜嘅中生製藥(01177)半日跌4.7%，其他跌逾一成嘅股份比比皆是。線上醫療股更加插到反艇，平安好醫生(01833)、阿里健康(00241)跟京東健康(06618)，通通跌超過一成。
科網平台股同樣無眼睇，騰訊(00700)業績都叫見得人，公司仲回購，出錢又出力，但股價今早仍要跌0.1%，美團(03690)跟阿里(09988)分別跌7.1%及2.2%，阿里屢創上市新低，未知幾時搵到個底。眼見港股跌到一仆一碌，雖然今日唔少股份已跌到一個相當吸引水平，尤其係啲有錢賺嘅平台股，好似騰訊跟阿里咁，但監管風暴後，可能又要面對增加利得稅嘅問題，總之博反彈真係要先計好數，預咗放低幾多先好入場，否則過完個周末返嚟，隨時又被割韭菜執多劑。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。