內地半導體行業路難行 急跌亦未宜撈貨
上周五美國公布非農數據，其實周三嘅小非農已預示美國就業市場唔係差，結果大非農出嚟數據反映美國就業市場仍然強勁，咁即係美聯儲局仲大把空間加息。鮑爺一直強調，目前聯儲局大前題係要壓抑通脹，就連聯儲局唔少本身比較鴿派嘅官員，已相繼口吻轉鷹， 以配合聯儲局嘅收緊貨幣政策。上周美股顯著下跌，道指跟標指跌逾2%，分別跌630點及104%；納指更跌逾3%，跌420點。至於呢個星期美國將公布通脹數據，而中國喺星期五亦會公布一系列經濟數據，估計都會令市場波動。美國除咗通脹數據之外，第三期業績期亦會由銀行股掀起序幕，喺咁嘅經濟環境之下，銀行股業績唔會好得去邊，雖然市場普遍預期美國企業今年業績仍能保持增長，但盈利增速及表現已大不如前，加上息率及通脹高企，以及美匯指數強勁下，股市又邊會有運行。
至於港股喺黑期及ADR大幅低水下，今朝裂口低開都屬意料中事，恒指低開290點，報17449已經係半日高位，低開低走，盤中一度低見17242，跌近500點。中午恒指報收17298，跌441點；國指跌158點，報收5916；恒科指跌逾3%，跌122點，報收3417。北水回歸半日成交相對星期五增加，半日成交額548.45億元，不過望見個市嘅表現，就知北水返嚟唔係幫手買貨，係當港股係提款機，沽貨套現。
藍籌股大部份下跌，當中以李寧(02331)半日跌近一成最慘情，主要係內地疫情反覆，多個城市又進行局部或大規模封城，復常概念股跟消費股全部插水。OPEC為穩定油價已宣布減產，更講到明要將油價設定喺90至100美元，油價回升，三桶油逆市做好，當中以中石油(00857)半日升1.2%，表現最好。其他重磅藍籌股清一色插水，大笨象(00005)半日跌2.4%，暫時險守40元關；友邦(01299)打回原形，又重返70樓下。ATMJ全線下跌，騰訊(00700)跟阿里(09988)分別跌1.7%及2.9%；京東(09618)半日跌3.7%；美團(03690)受內地疫情反覆影響，半日跌5.9%。
除咗復常股今日插水，半導體股今日跌勢亦顯著，美國商務部上周五(7日)收緊出口管制，以限制中國獲得先進芯片、開發超級電腦，以及製造先進半導體的能力。南韓跟台灣兩半導體領先生產地，已表示將遵守美國管制，唔少專家指中國半導體行業將大幅跑輸世界水平，更有笑言指內地半導體行業將進入石器時代。半導體股就算得到國家政策大力扶持，但無世界先進技術，講乜都無用。上海復旦(01385)半日大跌17.6%；華虹(01347)插9.1%；中芯(00981)跌2.7%已經算跌得少。呢個板塊喺美國技術限制下，唔會有運行，咪見跌得到心思思想撈貨，緊記跌得多並唔係買貨嘅理由。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。