內地監管未完 傳螞蟻為重點審查對象
美股隔晚表現反覆，早段道指曾升逾200點，收市卒之倒跌250點收場，標指跟納指同樣倒跌收市。上周美國公布嘅就業數據強差人意，本來可緩解聯儲局收水嘅憂慮，但美國10年期長債孳息並無因此掉頭，反而升至1.6厘至6月高位，皆因能源價格高企，令通脹難以回落。但疲弱嘅就業數據反映經濟復甦或不似預期，市場開始擔心嘅唔係通脹，而係滯漲，聯儲局喺收水上，遇到兩難局面。
而A股今早亦有啲腳軟，港股連彈三個交易日，恒指升逾千點後回吐，半日喺25000點水平徘徊。恒指低開329點，一度跌421點，見24903點半日低位。其後跌幅收窄至136點，曾見25188點半日高位。半日恒指跌259點，報收25066點；國指則跌107點，報收8891點；恒科指則跌143點，跑輸大市跌逾2%，報收6260點。半日成交743億元，唔知係咪颱風圓規逼近，缸邊友無心戀戰，不過天文台講咗下午4至6點先掛8號風球，即係今日點都係全日市，唔使擔心開開吓市無得玩嘅。
噚日反彈力度顯著嘅科網股，今日普遍見回吐，其中阿里(09988)半日登上成交榜首位，半日跌3%，ATMX之中佢回得比較多。噚日同阿里一齊勁彈嘅美團(03690)，半日只係回返1.5%，暫時仲守喺270元水平之上，但誠如噚日阿Man所講，280至290元阻力邊有咁容易突破，阻力前回吐好正常。至於騰訊(00700)要重上500元水平亦要時間，阻力位唔係一下子可以上破，今日回吐2.4%，噚日都提晒水，博反彈嘅見好要收，要識得落車食糊。小米(01810)呢期都算弱，噚日彈又唔算多，今日回吐半日又跌返1.6%，22元由之前嘅支持位變咗阻力位。
阿Man噚日都話咗唔敢太肯定監管風暴係咪隨住美團被罰款而告一段落，話口未完阿爺又話要對金融機構同大型民企嘅關係展開調查，而阿里旗下嘅螞蟻集團傳聞係重點調查對象之一，你話死未。阿里半日跌3.8%唔單止成為表現最差藍籌股，旗下阿里健康(00241)半日亦跌2.6%。其他科網股普遍回吐2%以上，所以話呢，高追真係無乜好結果，始終個市都係反反覆覆，暫時都未真係轉勢。瑞聲(02018)啱啱發完盈警，輪到舜宇(02382)公布9月手機及車載鏡頭出貨量按年跌21%，早段股價曾跌8.6%，其後有買盤趁低吸納，股價重上190元水平，暫時喺250日線(約192)爭持。其他手機設備股表現亦麻麻。
其他重磅藍籌股個別發展，大笨象(00005)半日再升0.1%，李寧(02331)反彈2.8%，係半日表現最好藍籌股，其他藍籌股普遍偏軟。餐飲股今日有資金追捧，其實市場得嗰一兩注錢，都係喺唔同板塊之間輪動炒嚟炒去，大市亦係表現反覆，暫時都係喺24000至25500之間上落，既然晏啲都掛8號風球，不如早啲執定包袱，等收市嗱嗱聲返屋企。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。