內房急升勿追 核心問題仍有待解決
隔晚美股先跌後回升，雖然就業市場強勁，聯儲局大條道理5月份繼續加息，不過美國實體經濟唔係太差，即使上半年經濟增長放緩，標指股份盈利或見倒退，但有望於下半年回升，全年盈利仍會錄得增長，令美股出現逢低吸納買盤。至於港股ADR就跟隨美股做好，只係高開高走一段後，中午前回落，50日線(20486)得而復失。
恒指高開235點，其後一度升419點，見20750半日高位後回順，午前幾乎打回原形，僅升1點，見20333半日低位。中午恒指報升13點，收20344；國指無起跌，報6894；恒科指則跑輸，跌41點，報收4195。半日成交額754.06億元，以近期嚟講都唔算少。
藍籌股個別發展，以科技股表現較遜色，騰訊(00700)半日跌2.5%，京東(09618)跟網易(09999)亦腳軟，美團(03690)半日變化不大，ATMJ之中，只有阿里(09988)升0.9%，盤中曾高見101.5元，可惜紅底股身份未能保，半日報收98.65元。阿里雖公布最大型語言模型「通義千問」，但股價未能企穩百完大關，主要係之前熱炒嘅AI概念股，因陸續有國家如意大利，有意禁用Chat GPT，令相關股份今日走軟，百度(09888)半日跌7.1%，成為表現最差藍籌股。上周熱炒嘅AI概念股商湯(00020)，今早一度再升11%，不過獲利沽盤湧現，加上呢隻嘢上面蟹貨太多，半日倒跌近4%，忍唔住高追嘅，又硬生生被割韭菜。
內地3月份樓市表現不俗，多間內房公布3月銷量按年急升，內房股炒上。碧桂園(02007)半日升12.2%，係表現最好藍籌股，同系碧服(06098)緊隨其後，半日升近一成。其他內房股全線向上，普遍錄得超過4%升幅，二線內房升幅更強勁，閒閒地升一成以上，龍光地產(03380)更升近兩成。雖然內地房地產市場回暖，但阿Man對內房股嘅睇法仍未有改變，只會有波幅，冇升幅，3月份銷量係就係按年急升，但唔好忘記去年3月內地勁爆疫情，多個城市封控，基本上內地當時嘅商品房銷量，可以話跌至冰點，進入咗冰河時間，咁今年就已開始復常，以今年3月跟去年3月嘅銷量嚟比較，當然係相當強勁。再睇返啲內房股，其實手上仲有大把樓未賣，單係要搞掂去庫存等資金回籠都需時，而內地嘅空置房比率又高，好老實內地房地產市場，仍有一段漫漫長路要捱，趁熱鬧短炒都還可以，要坐定定坐長線，阿Man一定唔會揀呢個板塊。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。