隔晚美股喺油價回升下走軟，油價上升令通脹有機會升溫，10年債息重上4.27%，道指隔晚跌195點；標指跌18點；納指跌10點。今個星期無乜重要數據，下周三會公布8月CPI數據，估計再度回升，但市場暫時預期9月暫唔會加息。雖然美股有所回調，但市場氣氛唔係太差，標指暫時喺4300有不俗支持，但4600阻力唔少，都係區間上落。暫時市場對美股睇法有啲分歧，大摩就睇淡，表示美股估值目前過高，而下半年經濟增長又唔係勁，對美股9月同10月走勢唔睇好，而美銀跟細摩睇法接近，都係偏淡。不過，高盛就樂觀啲，認為美股喺未來12個月衰退可能性大減，由25%下降至15%，亦表示下半年美國經濟仍然向好，所以睇好後市。
不過美滙指數升至7個月高位，令人民幣離岸價重返7.3水平，港股噚日幾乎抹去前日升幅後，今早再跌。恒指低開22點，一度見18435半日高位，但其後沽壓增加，20日線(18402點)先失守，再失10日線(18310點)，一度跌200點，見18256半日低位。半日恒指報收18306，剛好穿埋10日線，跌150點；國指則報收6342，跌38點；恒科指半日跌43點，報收4130。半日成交縮到464.39億元，跌市成交縮，樂觀啲睇係沽壓唔算大，但悲觀啲睇，係回調都無買盤趁低吸納，買賣兩閒，一潭死水。
藍籌股普遍向下，大笨象(00005)跟友邦(01299)半日分別跌1.5%及1.9%，港交所(00388)半日跌0.8%算溫和，留意股價唔可以失守303，即100及250日線交匯區底部。至於AMTJB全線向下，百度(09888)跟網易(09999)半日跌逾2%，騰訊(00700)跟美團(03690)半日跌逾1%，阿里(09988)跟小米(01810)半日跌少過1%算係咁。沙特及俄羅斯延長減產布油價格重上每桶90美元，創10個月高位，石油股半日逆市做好。至於表現最差係聯想(00992)同申洲(02313)，半日齊齊跌逾4%。
要數今日最癲板塊，一定內房股，《證券時報》稱限購、限貸、限售等限制性政策已不合時宜，市場憧憬阿爺進一步放鬆內房股，加上碧桂園(02007)已付1.8億元境外債，半日爆升17.8%。不過唔及融創(01918)獲納入港股通升得勁，半日再升逾六成，已連續三日大陽急升。恒大(03333)跟世茂(00813)半日升逾三成，睇呢幾隻升得最勁嘅內房股，目前市場係難聽啲講，債務情況愈差愈去炒作，博呢啲瀕臨破產邊沿嘅內房死唔去，長命債長命還，只要唔死又係一條好漢。再睇埋內房國企嘅升幅，愈覺得以呢個邏輯炒內房無錯，好人好姐嘅萬科(02202)跟中海外(00688)，半日只係1.7%及1.6%；華潤置地(01109)更跌0.3%。講真用咁嘅邏輯炒內房，阿Man真係接受唔到，雖然呢啲公司呢一刻未死得，但未來能否大難不死，仍要睇銷售，而半日升得最勁嘅融創，正正係上月銷售額急跌，未來銷售道路仍荊棘滿途，至於債務問題只係拖得就拖，一時炒作唔等於整個內房產業債務問題完滿解決，反而炒到飛砂劈石，有內房股趁機批股抽水亦好正常，都係做個觀眾，食下花生算數。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。