內房抽水不絕 港股升勢受阻
上周美國公布PPI超過預期，美股上周五向下，市場觀望本周公布嘅CPI數據，以及聯儲局嘅議息結果，呢個星期四係超級星期四，除咗聯儲局仲有英倫銀行跟歐洲央行亦係當日議息，市場預期三間央行都係準備加息0.5%。至於港股喺兩星期累計升咗2327點，周五逼近二萬大關，無奈美股周五三大指數下跌，拖低咗夜期同ADR，加上碧服(06098)大股東減持舊股套現，影響大市氣氛，半日港股回吐逾300點。
恒指低開306點，見19594後跌幅收窄至182點，見19718半日高位，但高位再見沽壓，最多跌456點，見19444半日低位。中午恒指報19525，半日跌374點；國指半日跌179點，報收6654；恒科指跌144點，半日報收4225。半日成交額953.48億元，成交尚算暢旺。
藍籌股個別發展，ATMJ半日全線下跌，騰訊(00700)、阿里巴巴(09988)跟京東(09618)半日跌逾2%，美團(03690)半日跌近6%。港交所(00388)半日跌2%左右，相對累積升幅，港交所已算相當硬淨。濠賭股上周鑊氣鼎盛，今日仍再上升，但不敵大市整體下跌，整個板塊半日倒跌，中國金沙(01928)跟銀娛(00027)半日跌3%。不過公用股今日表現唔錯，中電(00002)跟煤氣(00003)半日分別升0.7%及0.6%。
碧服大股東東楊惠妍折讓逾10%售逾7%股權，半日股價跌16.6%，唔單止係表現最差藍籌，亦跌穿咗批股價。同系碧桂園(02007)已喺短短一個月內兩度配股集資，內房等錢使就眾所周知，但連大股東都急急腳抽水，喺現水平配舊股套現，除咗係等錢使，亦令人意識到內房物物管股嚟到呢啲位都差不多。其他內房物管股亦受累，半日普遍回吐，市場憧憬內地喺優化防疫措施後，短期內可通關，航空股今日續升，東航(00670)升4.8%，南航(01055)升3.9%；國航(00753)升2.5%。有報告指內地三大航空公司明年扭虧，調高國航及南航評級。而國泰(00293)亦升2%。
國內多地調整新冠防疫政策，全國進入疫情居家防控新時期，內地已出現成藥搶購潮，而市場對新冠病毒防治藥物需求急劇增加，相關製藥股乘機落鑊爆炒。山東新華製藥(00719)爆升三成六，A股升停板；其他製藥股普遍錄得五成或以上升幅。
港股急升過後，喺高位整固，出現調整亦好正常，暫時回調目標係10日線左右，即係19100水平左右，但條件係要先跌穿19400，至於大市喺18300至18400嘅水平有較強大支持，只要守得住呢啲位，後市仍係向上，可以向住20000至22000目標進發。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。