內房新春期間銷售未見旺丁及旺財
初九開工大吉，各位讀者Good luck兔you，虎去金來，兔氣揚眉，今年大旺，心想事成，買乜都得，贏到開巷。內地股市今日復市，上證跟深成指數紅盤高開，兩指數分別升0.72%及1.6%。港股連升六個星期，累積升逾3000點，升至11個月高位。雖然美股上周五已六連升，三大指數仍有進漲，但港股今日撞正期指結算日低開低走，半日跌幅擴大至超過300點。恒指低開109點，一度收窄至65點，見22623半日高位後，跌幅再度擴大至超過300點，見22320半日低位，半日跌368點；國指則跌171點，報收7602；恒科指跌131點，報4681。半日成交額已達1001.1億元，北水回歸半日錄得淨流出34.6億元，北水都唔係笨，見內地放假期間，港股升咗上嚟，今日一復市就返嚟沽貨套現。
今個星期美股估計會較為波動，周二及周三晚有FOMC議息外，歐洲央行跟英倫銀行亦議息，市場關注聯儲局會否一如預期減慢加至步伐至0.25厘。除咗三大央行議息外，仲有周五公布非農數據，留意失業率會否反彈，皆因呢個月都唔少大型美企裁員，另外時薪增幅亦係市場關注嘅數字。另外，本周更有唔少科技巨頭公布業績，包括，亞馬遜、蘋果及Google母公司Alphabet三重量級科技龍頭公布季度業績，而Meta亦會喺本周三派成績表。
藍籌股之中，以公用股表現最好，似乎資金喺大市累積咁大升幅後，開始保守返啲，煤氣(00003)跟中電(00002)半日分別升5.1%及2.9%，前者更成表現最佳藍籌股。至於表現最差藍籌股為碧桂園(02007)，半日插水7.1%。之前阿Man都多次強調，內房債務雖然有阿爺出招撐，但問題只係治標未能治本，主要係內地房屋銷售未有耐回復之前嘅狀態，睇返剛公布過去一周30個大城市商品房成交大約係4.47萬平方米，僅及去年同期兩成，內房嘅銷售情況仍然未如理想。內房企業未能賣樓套現，公司未來仲要靠借貸渡日，即係最終又係要啲內銀孭飛，呢個亦係我一直唔睇好內銀股嘅原因。其實以目前中港兩地股市嘅估值嚟講，係平過美股一大截，但資金都仍然願意買美股，而未見全程投入港股或內地股市，相對流入內地跟港股嘅資金唔算好多，主要係內房債務問題呢個計時炸彈一日未拆除，最大嘅產業鏈仲係死死下，都係拖住內地經濟後腿。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。