內房民企識揀一定係揀碧桂園
美國孳息曲線倒掛，國際油價則大幅回吐，市場憂慮未來經濟可能出現衰退，美股早段走弱，但其後三大指數回升，三大指數齊升收市，支持港股繼噚日反彈後，今日持續向好。不過A股高開低走，令港股表現反覆，目前喺21800水平爭持。恒指高開86點，半日最多升252點，見21937半日高位。其後A股倒跌，港股沽盤湧現，大市升幅收窄至只得37點，見21722半日低位。半日恒指報收21783，升98點；國指半日升48點，報收7445；恒科指半日報收4529，升0.78%。留意半日成交只有675.6億元，似乎少咗啲，唔知係咪明日期指結算關係，大家都想等結算後，大市有更清晰方向再入場。
藍籌股之中，今日表現最差係小米(01810)，雖然一年一度嘅米粉節優惠將於本周五展開，但股價半日跌逾7%，都幾難睇，完全跑輸ATMJ其餘四隻重磅科技股。相反美團(03690)愈戰愈勇，業績公布令市場甚為滿意，美團今日再下一半，半日再升多半成，逼近160元水平，留意160元為短期力，如果順利突破兼企得穩，下一個目標當然係180元。騰訊(00700)跟阿里(09988)兩者分別升2.2%及1.8%，兩公司均積極回購，尤其阿里回購金額規模高達250億美元，對股價帶嚟唔少支持。內地股市偏軟，內銀跟內險股表現亦麻麻，主要係內地疫情再度升溫，深滬兩地先後封城，要A股做返好啲，呢兩個板塊先有運行。
本地銀行股同樣受壓，主要係市場憂慮全球經濟或陷入衰退，銀行業係百業之母，經濟唔好，銀行自然生意難做。大笨象(00005)半日跌1.3%，阿Man都講過，大笨象由四十幾蚊回升至最高58左右，個升浪都行完咗，家陣喺50至55之間上上落落，唔會有乜嘢睇頭。其他港銀股跌幅由0.1%至2.6%不等。不過港銀股一向唔係阿Man杯茶，升升跌跌都吸引唔到我嘅關注。
喺第五波疫情下，港股「通關」，百業肅條，地產市道又點會好，本港樓價指數連跌兩個月，創13個月低，加上美國加息陰霾下，本地地產股整體受壓。呢一輪只有超人系嘅股份跑贏，其他地產股都係唔多精神。至於收租股可能好少少，皆因市場憧憬下月防疫措施分階段放寛，仲有消費券發放，喺第五波疫情下，抑壓唔少消費力，可能有機會喺下月釋放，唔排除有報復式消費出現。
至於內地股個別發展，阿Man心頭好碧桂園(02007)係少數唔跟板塊下跌嘅內房股，阿Man之前亦好次強調，碧桂園係少數財務狀況穩健嘅民企內房，要買民企內房必選無疑，今日股價表現亦證明阿Man嘅睇法無錯。好似融創(01918)呢啲經常傳出未能如期償還債務嘅內房股，真係唔係貪平，公司公布未能如期公布業績，並預告周五起停牌，股價半日跌近兩成，之前反彈嘅升幅，幾乎全被抹去打回原形。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。