內房產業危機不解決 中國恐陷經濟衰退
美股繼續走強，喺美國基金現金水平偏高下，美股反彈毫無障礙，加上長債回落，市場資金再度risk on，可惜港股又係跟唔上美股步伐，今早高開低走。恒指高開142點，最多升213點，見20788，但A股由升轉跌，拖累港股升幅蒸發，得返9點升幅，見20583半日低位，其後於20600水平上落。恒指半日報收20598，升24點；國指升14點，報收7113；恒科指升16點，報收4598。 半日成交額只有465.64億，少得可憐，本來呢個星期港股成交已縮晒水，再加埋今日周末前夕，資金更加唔願意入場。
藍籌股個別發展，港股成交係咁縮，港交所(00388)生意淡薄，股價半日跌0.5%。多隻傳重磅股腳軟，中移動(00941)、友邦(012929)齊跌0.6%。不過大笨象(00005)喺回購支持下，股價半日升1.2%，成為恒指嘅主要支撐。重磅科網股表現較佳，ATMJ全線向上，不過升幅就唔算顯著，升幅都少於1%。雖然美國初步通過晶片法案，但中芯(00981)嘅晶片技術未有受阻，反而見重大突破，股價半日升1.7%。
澳門娛樂場明日起有限度開放，濠賭股全線向好，不過升幅又唔算太顯著，金沙(01928)、澳博(00880)跟永利(01128)齊齊升逾2%，不過其他濠賭股就無咁嘅升幅，有啲其至連1%進帳都唔夠。反而汽車股今日有啲睇頭，主要係全球電動車龍頭Tesla 上季業績好過預期，隔晚股價升近一成，相關概念股上升。不過又係嗰句，升幅唔顯著，主要都係無成交配合。
內地房地產市場疲弱，內房問題多多，影響整個產業鏈，摩通預期水泥需求難以反彈，調低多隻水泥股目標價，整個板塊股價下，跌幅由0.5%至超過6%不等。目前內地房地產問題，已開始延伸至整條產業鏈，其至影響內銀股。一旦內地仍然束手無策，不及時拆彈，恐怕誘發全國金融系統性風險，後果不堪設想。
目前內房產業嘅危機，並非單純國內個別地區，而係一個全國性重點產業均出現問題，而風險更有可能傳導至金融體系，若當局未能果斷解決問題，截斷蔓延風險，將拖累埋內循環呢一招都用唔着，屆時恐怕經濟陷入衰退。再加上去全球化，中美博奕等問題，往後日子有排捱。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。