內房股仍疲弱 暫宜先忍手
美股結束四連跌回升，隔晚港股ADR重上二萬五關，港股半日做好，但早段表現甚為反覆。恒指高開224點，不過二萬五關開市後得而復失，恒指一度倒跌33點，見24929點半日低位。其後喺25000關爭持後回勇，半日最多升穿266點，見25228點半日高位。恒指中午報收25170點，升207點；國指升58點，報收8907點；恒科指升63點，報收6263點。半日反彈成交過千億，叫做呢幾日反彈市成交比較配合嘅一日。
藍籌股個別發展，汽車股表現突出，光伏股亦有資金追捧，信義玻璃(00868)升7.3%，信義光能(00968)半日升6.2%；大笨象(00005)繼續做好，半日再升1.8%，喺債息高企，息差有機拉闊下，對其股價帶嚟支持。內地汽車銷售數據理想，汽車股半日炒起，吉利(00175)半日升7.7%，為最大升幅藍籌股，比亞迪(01211)半日升6.6%，藍籌之中表現唔錯。其他汽車股升幅由接近半成至超過一成不等，連帶4S汽車股亦見資金追捧。汽車股係咪調整完成，再展升浪，阿Man唔肯定，始終受芯片問題所困擾，但從技術走勢分析，唔少汽車股都似完成調整再發力。不過今日急升就唔追貨，若然下星期返嚟有回調，而又守到平均線支持位，再搵位再車都未遲。
教育股衰咗咁耐，終於有個好消息翻身，內地日前公布《關於推動現代職業教育高品質發展的意見》，提出健全多元辦學格局，鼓勵上市公司、行業龍頭企業舉辦職業教育，鼓勵各類企業依法參與舉辦職業教育。教育股全線做好，閒閒地升一成以上，新高教(02001)升幅更超過兩成。雖然呢堆股份今日急升，但較受政策打壓前高位，現價仍然算喺山腳，呢個板塊係咪從可以脫離低迷走勢，平步青雲，仍有待觀察，始終跌得咁深，上面個個位都有蟹貨侍候，唔係咁易擺脫長期弱勢。如果要就住今次呢個消息揀股，都係揀返啲職教股較為穩陣。
內房股維持弱勢，恒大(03333)事件未解決之餘，陸續有中小型及高槓桿嘅內房股出現資金緊絀，甚至違約事件，暫時內房股都係避之則吉，雖然央企或國企內房及龍頭內房實力較佳，但面對整個行業資金鏈問題，同埋融資成本上升，暫時想買內房股都係要忍手。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。