公司配股集資用途得宜 消化配股沽壓後照升可也
隔晚美股做好，加上美匯又回復跌勢，再跌穿90大關，有利亞洲區股市表現,但港股連升三日，恒指漲逾700點後，見獲利回吐，半日由升轉跌。恒指高開32點，報28309，開市後最多曾升137點，見28414半日高位，再創去年1月21日近一年高位。不過港股連升幾日，獲利盤湧現，大市轉升為跌，一度倒跌31點，見28245半日低位，其後好淡爭持。最終恒指半日收報28268，跌7點；國企指數跌18點，報11199；恒科指數跌30點，收8695。
藍籌股個別發展，友邦(01299)跟大笨象(00005)齊齊跌逾1%，係拖低大市嘅主要動力，不過騰訊(00007)跟阿里(09988)分別升1.4%及1.8%，撐起大市。美團(03690)及小米(01810)半日下跌，重磅科網股表現好壞參半。今日石油股表現突出，國際油價升至11月個月高位，重返疫情爆發前水平，有資金追捧石油股。中海油(00883)半日升7.8%，成為最大升幅藍籌；中石油(00857)及中石化(00386)半日分別升5.2%及2.9%，其他油服股亦見上升。不過石油股短暫嘅升勢，係唔會吸引到阿Man嘅眼球，皆因全球經濟復甦進度如何仍屬未知數，加上全球減碳排為大趨勢，未能新能源使用量比例將持續提高，對石油需求只會相應減少，長遠計，石油價格只會穩定發展，而唔會大幅上升。
內地政策重點扶持內循環，力谷內需其中一項係加快更多基建項目上馬，內地重型建築機械銷售暢旺，其中上月挖掘機械銷售按年升56.4%，重卡預售則升24%，多隻建築機械股落鑊熱炒。阿Man上周推介嘅中聯重科(01157)半日升一成，較上周推介時升兩成，又係食糊唔使問，套利幾時都無錯嘅時候。其他重型機械股普遍錄得5%或以上升幅，中國龍工(03339)升2.2%已經係失禮。有貨可以先沽出部份套利，留返貨底繼續睇。
留意今日唔少股份配股，踏入新一年嘅首個月，唔夠兩星期已經有唔少公司急不及待配股，當然跟近日大市升勢有少少急有關，不過唔少股份配股後都守得住配股價，只要消化配股沽壓後，或者又可以重新出發。留意相關配股股份，集資用途係乜嘢，如果要嚟減債或只係一般流動資金用途，當然差少少，如果集資係用作收購或擴產，股價又守得到配股價，其後大都有機會重拾升勢，好似信義光能(00968)就係配完股再創新高嘅股份。而去年多次配股嘅藥明生物(02269)，即使當中有部份配股來自股東減持，但只要貨源仍落入中手，股價仍能愈升愈有，屢創新高，呢個正好引證阿Man所講嘅「貴股繼續貴」。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。