北水托住指數減貨走佬
美股隔晚反彈，三大指數維持向上，不過留意美國10年期國債孳息持續抽高，已升至今年6月高位，喺亞洲時段升勢維持。港股噚日喺成交未能配合下急彈700點後，今早高開低走，20日線得而復失。雖然美國兩黨達成債務協議，將債務上限提高至4800億美元，美國政府至12月初可避免債務違約風險。不過美國10年期國債孳息持續向上，對股市嚟講都唔係好事。
恒指高開363點報25064點，創超過三個星期高位，但開市後無以為繼，未能企穩25000之後升幅收窄，臨近午市近一度倒跌逾百點，低見24595，20日線(24713)得而復失。最終恒指半日收報24636，跌65點；國指中午報8690，跌22點；恒科指跌30點，中午報收6141點。北水今日回歸，半日成交回升至947.6億元，但先升後跌嚟成交增加，反映投資者高位爭相走佬，唔願意持貨過周末。
美國債息向上，帶動本地銀行股做好，大笨象(00005)半日再升0.8%；恒生(00011)連升五個交易日，半日再升近1%。不過內銀股就個別發展，建行(00939)跌，工行(01398)升。瑞聲(02018)發盈警，股價半日一插13.7%，成為表現最差藍籌股；拖累手機設備股普遍向下，舜宇(02382)半日跌1.5%，跌勢已算溫和。除咗瑞聲之外，李寧(02331)半日跌8.7%，跌勢亦相當顯著，同業安踏(02020)跌2.4%，睇嚟都係估值問題，估值高嘅自然跌多啲。
內地煤價大跌，唔係阿Man馬後炮，話咗內地限電後，隨之而嚟係煤價下跌，一係因為發力量減令需求減少，動力煤自然會跌價；再唔係就阿爺出手，限制煤價上升，以減低火電企業嘅成本及損失。叫咗咪多手追煤炭股，今日煤炭股全線捱沽，相關股份跌幅由半成至超過一成不等。
咪以為煤價回咗，電力股有運行，限電問題一日未解決，電力股都有啲棘手，唔理係轉型清潔能源股份，抑或傳統火電股，今日全線下跌，無一倖免，跌幅一成以上比比皆是。電力設備股同樣見沽壓，哈電(01133)半日重挫一成。能源荒影響生產，全球經濟復甦或被拖累，航運股炒咗咁耐，都趁機會大調整。講真呢個板塊累積咁多升幅，投資者要減磅，即使較高位回咗唔少嘅航運股，到呢一刻沽貨，仍然係贏住走，航運股同樣跌勢顯著，跌幅由半成至一成以上不等。
數數下就只有科網股力撐大市，重磅股ATM全線向上，靠佢哋頂住指數，其他科網股大部份先高後低，雖然部份亦逆市上升，但升幅已較早段大大收窄。今日呢啲市況，北水回歸似乎無助港股向上，反而得幾隻重磅指數股撐起大市，其他唔少股份都走晒樣，予人一種大戶托住指數走貨嘅感覺。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。