北水暫停交易 缸邊友收檔放長周末
俄烏談判毫無進展，亦未有停火跡象，市場焦點又再折返到去貨幣政策方面，而美國強勁嘅就業數據跟經濟數據，都支持聯儲局經續放鷹，預期喺較為緊縮嘅貨幣政策下，美股借勢回吐，三大指數均下跌。港股過去三日回升近900點，今早高開低走，盤中一度跌逾300點，22000關失而復得。
恒指高開30點，報22262為半日高位，其後內地公布3月製造業PMI降至49.5，差過市場預期，大市轉升為跌，更一度跌穿22000，見21922半日低位，其後跌勢收歛，大市重上二萬二。恒指半日跌179點，報收22052；國指跌50點，報7558；恒科指跌58點，報收4564點。半日成交只有511.28億元，未到周末前夕，成交已縮水，似乎缸邊友都唔想入場，尤其係下周二港股假期，內地下周一及周二亦放假，南向北水今日開始暫停，星期三先回歸，唔少人呢幾日收檔唔炒，自製一個長周末，到下周三先再作戰。
藍籌股個別發展，今日似乎消費股表現較差，幾隻成份股嘅消費股，包括農夫山泉(09633)、蒙牛(02319)、申洲(02313)、安踏(02020)跟李寧(02331)等，都錄得2%以上跌幅，當中申洲半日更跌6.5%，係表現最差藍籌股。今日港股早段能夠收窄跌幅，重上22000水平，多得有資金流入內銀股，內銀股公布業績都有唔錯表現，支持股價呢期做好，建行(00939)已連升6個交易日，半日再升2.4%，其餘內銀股普遍錄得1%以上升幅。
美國證交會(SEC)新增百度(09888)入預定除牌名單，中概股陰霾未散，香港上市嘅科技股亦要遭殃。不過今日科技股下跌，阿Man都只會視為正常回吐，畢竟呢堆股票，尤其重磅嗰幾隻巨無霸，喺月中見底反彈，睇返當時成交，應該成功尋底企穩回升，想要落返月中嗰啲低位，暫時無乜可能。反而之前有執平貨嘅，阿Man指出過ATMXJ嘅短期阻力，而過去兩日反彈市中，佢哋亦已先後達標升至阻力水平附近，呢兩日回一回氣，稍作整固亦屬意料中事。
雖然陸續有內房企業未能如期公布業績，但阿Man早於月初已指出，內房股最差時間已過咗，只要有股東增持或公司回購，反映管理層對前景仍有信心，仍然有內房股回吐，話唔定喺搵位上車嘅好機會。當然阿Man都只係會揀有國企或央企背景嘅內房，即係中海外(00688)跟潤地(01109)呢兩隻。如果揀民企內房，當然要揀財務狀況較穩健嘅龍頭，好似龍湖(00960)跟碧桂園(02007)呢一類。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。