北水炒作快來快去 市況反覆未宜進取
美股隔晚偏軟，市場觀望今晚美國公布通脹數據，能否為聯儲局未來貨幣政策提供線索倪端。港股都係無乜方向，不過回咗六個交易日後，今早反彈逾200點後回落，暫仍受制29000大關。恒指高開49點，甫開曾倒跌1點，見28741點半日低，之後A股做好帶動下發力轉升，曾反彈211點，見28954點半日高位，但受制29000後回順。恒指中午收報28828點，升86點；國企指數報10737點，升32點；恒科指跌3點，報7968點。半日成交接近700億，暫時仍未能打破悶局。
藍籌重磅股ATMX之中，只有騰訊(00700)半日跌0.4%，其餘三個成員以小米(01810)回升近2%表現最好。海底撈(06862)半日跌4.2%，係表現最差藍籌股，40元失守，似乎要繼續向下尋底。舜宇(02382)則回吐近3%，手機設備股個別發展。
今日航運股表現突出，波羅的海乾散貨指數(BDI)連跌十日後反彈，日前阿Man曾有專欄推介中遠海控(01919)升一成破頂，太平洋航運(02343)亦升近一成，其他航運股閒閒地升4%以上，中外運(00598)半僅升1.4%，表現喺板塊中算落後。
蘋果汽車令人憧憬內地相關新能源企業將得到其訂單，新能源股今日有資金追捧，比亞迪(01211)半日升7.4%。光伏股亦有資金追捧，當中以福萊特(06865)半日升一成，板塊內其他股份升幅由1.1%至8%不等。當中信義光能(00968)走勢唔錯，不過又係喺100日線阻力前停步，即管睇睇能否成功企穩14.75，即100日線之上，始終由24元高位回落，上面囤積唔少蟹貨，關關要過關關難過。
恒大系受財政不穩問題所困擾，恒大(03333)雖然回購1220萬股，不過中誠信將恒大地產主體及相關債項信用等級列入信用評級觀察名單，恒大半日跌1.6%。雖然新能源車板塊炒起，但恒大汽車(00708)廝人獨憔悴，半日跌4%，暫錄七連跌。恒騰網絡(00136)急插14.3%。恒大物業(06666)跌2.3%。暫時呢一系都係少多手，尤其落近嘅股份，更加唔好隨便接飛刀。暫時大市仍然上上落落，未能突破，始終成交唔配合，大市都係呆呆滯滯。只能跟住資金喺唔同板塊之間穿梭短炒，尤其北水快嚟快去，暫時都只能夠以短炒為主，大市未確認突破前，不宜進取。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。