【盤房來料】十蚊雞止蝕博美團染藍後重返三百水平
美滙指數持續疲弱，反而對股市利好，雖然美股隔晚個別發展，但最終三大指數仍能保住升勢，港股今日亦造好，成功收復10日線(26603)。恒指高開90點報26623點，升幅一度收窄至23點，見半日低位26556點。不過美滙弱係利好港股，港股再拾上升動力，恒指半日最多升249點，見26781點半日高位，中午收市時回順。恒指半日升149點，收26682；國企指數收報10566，跌7點；恒生科指收報7921，升73點。
今日港股向上主要靠兩隻國際金融股支撐，尤係大笨象(00005)半日升2.8%，逐步收復4月1日所遺下嘅下跌裂口，不過提多大家一次，45元阻力唔細，依家先嚟追貨值博率有限。友邦(01299)半日升0.17%，暫時仍於高位整固。大摩嚟一招魔笛追魂，唱好九置(01997)跟領展(00823)，不過阿Man始終認為未來租金仍有下調壓力，尤其疫情已徹底改變消費習慣，零售企業未來只會更着重線上銷售，實體店數目只會減少，短線反彈都唔會引起阿Man興趣。石藥(01093)半日升5.2%，不過死貓彈要注意8元有阻力。而中信股份(00267)被花旗降目標價，半日跌5.2%，藍籌當中跑第尾。
至於呢期被捧上天嘅中資金融股，今日回吐受壓，而睇返內銀股跟內險股今日嘅走勢，重磅內險股表現好過內銀股，回吐壓力唔太大，兩個板塊雖然阿Man唔係好睇好，但硬係要二選一，點都係內險股秤高一線。
資金繼續新舊經濟股之間輪動，噚日因為多隻熱炒股配股集資而捱沽嘅科技股，今日普遍反彈，騰訊(00700)半日升1.9%；阿里(09988)走高0.8%；對手京東(09618)漲1.1%；只有美團(03690)仍未反彈。至於噚日宣布配股嘅小米(01810)，半日回升2.9%，噚日阿Man講過小米下限訂價配股，股價午後復牌下挫係上車好機會，噚日午後開市曾失守配股價，若然有跟阿Man提議趁低吸納，噚日收市已可以持貨坐得安安樂樂，今日半日輕輕鬆鬆再賺近3%；同系金山軟件(03888)半日亦升4.8%。
疫苗好消息一浪接一浪，唔單止美國將向民眾提供疫苗，英國亦向民眾發放疫苗，出行股做好，包括航空股跟機場股，只係相關股份又逼近阻力位，現價再追都無乜水位。與其再追呢類股份，阿Man寧願博一博明日因應下周一恒指服務公司季檢後指數出現變動，追蹤相關指數基金會進行rebalancing，好似恒指新貴美團(03690)反而有啲短炒價值，現價買用十蚊雞止蝕，博美團染藍重返10日及20日線，即296-300元，計落都有一定值博率。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。