升市搵位食糊 留子彈回調時撈貨
美國散戶跟大鱷對撼雖然未去到終結，戰線更由股市延伸至商品期貨市場以及白銀相關股份，但市場對相關活動加劇市況波動憂慮退減，加上目前呢件事嘅嚴重程度，並未去到會引發美股大幅調整，導致股災機會更微乎其微，美股缸邊友又再埋位，隔晚美股反彈回升，港股承接噚日反彈勢頭，今日進一步回升至29000水平之上，短短兩日已回升逾千點，先後收復10日(29332點)及20日線(28822點)。
恒指高開485點，重返二萬九水平及10日線，雖然升幅曾收窄至313點，見29206點半日低位，但其後再發力錄得618點升幅，見29511點半日高位。中午恒指報收29419點，升526點；國指升253點，半日報收11707點；恒科指則重上萬點大關，半日升312點，報收10078點。睇返呢幾日恒指嘅走勢，已經形成咗個島形底，雖然市況仍然反覆，但至少都叫出咗個利好訊號。
恒科指重上萬點大關，當然要靠JATMX呢啲權重恒科指股，美團(03690)又創新高，繼續跑贏大市，半日升近半成，呢啲股真係買咗唔使睇，一睇見個累積升幅，好容易忍唔住想食糊。騰訊(00700)半日升4.5%，當見過騰訊一日可以升一成，七億市值嘅巨無霸都可以畀北水踢得郁，仲有人夠膽質疑北水嘅威力，阿Man真係無嘢好講。京東(09618)半日升4.6%，持續跑贏同業阿里(09988)，阿里收市後派成績表，即管睇睇份成績表同今年業績展望，幫唔幫倒阿里急起直追。小米(01810)半日升2.1%重上30元水平，呢一浸小米好似加水差咗少少，但諗返之前其他巨頭發呆嘅時候，小米一枝獨秀，家下放慢腳步亦不為過。成為連登契媽嘅女股神加持移卡(09923)，令阿Man跌晒眼鏡，若然錯過咗移卡升浪，倒不如睇返都係Saas股嘅微盟(02013)，始終有騰訊咁大個靠山，應該有條件再創新高。
其他科技股表現各有千秋，反映資金對於優質中企科仍然不離不棄，今年雖然未必如舊年一樣要貪新忘舊，全部押注新經濟股，但新經濟股繼續係資金寵兒嘅事實並未有改變，貪新不忘舊之際，新經濟股仍然睇高一線。至於舊經濟股，阿Man舊年第四季已不斷推介內需股，除咗體品股、汽車股等等，餐飲股亦曾推介海底撈(06862)跟頤海(01579)呢對孖寶，今日餐飲股普遍做好，兩股分別錄得9.2%及8.3%升幅。
不過連續兩日大市回升，恒指反彈過千點唔代表重拾升勢，下周農曆年長假返三個半交易日，北水玩埋今個星期收爐，呢段時間市況會較為反覆，唔建議升市追貨，反而升得急嘅股份要搵位食糊，待大市回調嘅時候先有子彈低吸。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。