友邦撐起半邊天 若能突破阻力可望新高
聯儲局維持利不變係意料中事，重點係鮑爺繼續放鴿，表示目前並非聯儲局縮減量寬嘅適當時候，雖然通脹升溫，但就業及通脹仍距目標相當遠。聯儲局唔閂水喉，加上蘋果季績收入強勁，又好過市場預期，納指期貨今早造好。以為港股嘅科技股可以受惠，偏偏事與願違，反而今日港股係由傳統股帶動向上。恒指喺期指結算日一度升逾300點，但中午升幅縮水一半， 不過今日總算企穩喺條50日線(29117點)上面。
恒指高開196點，開市已收復50日線，升幅縮水至133點，低見29204點，之後傳統股有買盤搶高，推動大市最多升333點，見29405點半日高位，並創六星期新高。但重磅科技股唔爭氣，港股升幅水瓜打狗無咁一截。恒指半日收報29251，升180點；國指收報11057，升42點；恒生科指則跌37點。
阿Man上周曾推介友邦保險(01299)，今日成為升市火車頭，半日升逾3%，為恒指升幅貢獻93點，直正撐起半邊天，亦係半日升最多嘅藍籌股。友邦升勢有餘未盡，留意105元有阻力，但能突破阻力，要創新高無難度。不過科技巨企表現麻麻。除咗騰訊(00700)半日微升0.8%之外，其餘小米(01810)、美團(03690)跟阿里(09988)全部腳軟。建行(00939)派首季度成績表，盈利平平無奇按年增長2.8%，股價半日跌0.8%，講真內銀股話咗業績唔會有驚喜，尤其四大國有銀行，年年啲數好似夾定咁款，齊上齊落，基本上一間派完成績表，已能預知其他幾間嘅成績如何。
內險股今日突圍而出，財險(02328)、母公司人保(01339)，業績雙雙報捷首季多賺四成，股價半日分別升6.5%及3.9%。國壽(02628)半日升1.8%，首季因為投資收益增加，多賺67%，不過股價半日只升1.8%，升幅逺不及財險同佢阿媽。其他內險股全線上升，升幅由1.2%至3.4%不等。內地券商股亦無啦啦落鑊炒業績，小心呢個板塊炒作短癮，抽升一日半日又無影，內地券商股一向唔襟炒，高追易中伏係唔係今日嘅事。
美國鮑爺繼續放鴿，美滙指數回軟，商品金屬價格又炒高，資源股抖完又嚟料，總之資源股板塊中，阿Man一向唔睇好三桶油，與其話唔睇好，不如話視而不見，大大個OPEC控制住油價，唔通你會認為自己猜測油價走勢，會勁得過阿拉伯酋長?? 既然油價難捉摸，而石油股又係緊貼油價走勢，不如睇少瓣，唔炒石油股。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。