反彈雖持續 惟成交一直未配合
國家統計局公布，5月份全國居民消費價格按年上漲0.2%；工業生產者出廠價格(PPI)按年降4.6%，連跌8個月，跌幅大過市場預期。內地嘅經濟數據難睇，反而令市場憧憬內地隨時出招刺激經濟，令中港兩地股市跌唔落。加上美國嘅就業數據麻麻，市場都估計今個月聯儲局未必加息，或者到7月加多一次之後，暫停加息甚至喺第四季減息，所以美股表現亦硬淨，造就港股今早高開倒跌後再回升。
恒指高開34點，最多升94點見19393半日高位後掉頭，至內地數據公布強差人意，大市曾倒跌68點，見19231半日低位，不過仍然守住20日線同19200短線支持，半日收市再度回升，中午恒指報收19352，升53點；國指半日升31點，報收6571；恒科指半日升23點，報收3917。半日成交額進一步縮水至384.27億元，周末前夕，缸邊友更無意欲入場。
藍籌股以中，科網股表現唔錯，今日代替咗友邦(01299)跟大笨象(00005)去支撐大市，友邦半日跌近1!，大笨象半日則靠穩持平。ATMJ全線向上，0.4%及0.6%，京東(09618)早段下跌，半場倒升0.2%。成交日日縮，港交所(00388)半日逆市跌0.2%。內地金融股則靠穩，半日變化唔大。
至於內房跟物管股炒咗兩日阿爺或出招撐之後，今日終於見回吐，話咗呢個板塊有波幅，無升幅，早兩日虛張聲勢，就算真係有乜政策推出，都仲要好長時間去復原，今年之內呢兩個板塊都係咁上下，短炒打游擊要快轉身，長線坐貨免問。
暫時恒指已守穩10日線及20日線，短線反彈仍可持續。只係每日成交少得可憐，完全未能配合升勢，遖續兩個交易日成交額不足900億元，咁嘅成交反映入場資金有限，嚟到19000水平已無太多資金肯再追貨，不過向好嘅方面諗，嚟到呢啲位沽壓亦唔係太大。除咗每日成交額愈玩愈縮，連帶港股嘅IPO活墧亦減弱，上半年港股嘅IPO集資額竟跌至全球第五位，三甲地位早已不保。外資逃跑後一直未見再入場，令成交愈玩愈縮，IPO自然唔願登陸咁嘅市場，惡性循環下，成交又繼續縮，港股愈見A股化，長線變咗有波幅，冇升幅，加上由北水主導，政策風險又高過人，港股未來前景如何，大家應心裡有數。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。