美國今晚公布通脹數據，數據結果將會反映經濟情況，會直接影響到聯儲局貨幣政策，市場當然先觀望，隔晚美股反覆偏軟，納指跌勢較顯著，跌幅達1.7%。港股連彈三日近千點進帳後，今日回吐返百幾點都無乜大不了，反正仲企到喺二萬四樓上，已經可以話漸入佳境。
恒指低開184點，見24070點，經已係半日低位，其後跌幅收窄至只有40點，見24214點半日高位。可能周末前夕關係，缸邊友都傾向減磅又或者唔買嘢，喺缺乏買盤支持下，恒指跌幅再擴大至過百點。恒指半日報收122點；報24132；國指報8625，半日跌31點；恒科指半日又係跌31點，報6071。半日成交只有610.75億元，真係隨時瞓得著覺。
藍籌股普遍下跌，不過又唔算跌得多，普遍跌幅喺1%以內，ATMX全線走低，反而藍籌新貴京東(09618)半日逆市向上，升1%。蒙牛(02319)呆咗幾日，今日無啦啦發力升1.6%，咁嘅升幅都係半日表現最佳藍籌，問你死未。
今日整體嚟講乏善可陳，CRO藥股同風電股表現較弱，呢兩個板塊之中，阿Man至愛嘅藥明生物(02269)同埋龍源電力(00916)都腳軟，前者跌2.1%，後者跌1.1%，不過之前都食咗好多次糊，趁回吐睇定啲，或者下星期返嚟又有死雞執。其他非龍頭股都腳軟，跌幅由2%至半成不等。
航運股今日側埋一邊，中遠海控(01919)升3.8%；東方海外(00316)升2%；中遠海能(01138)微升0.7%；勝獅貨櫃(00716)飆6.1%；但海豐(01308)下滑0.1%；太平洋航運(02343)微跌0.3%。
話咁快又到星期五，今日個市都係呆呆滯滯，周末前夕都唔使慌有嘢睇，其實都可以提早熄機，下半場不如去嘆杯茶，食個包，睇少半日應該都無損失。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。