周末前夕減磅套現留待回調吸納
雖然聯儲局口吻由鴿轉鷹，但美國十年債息竟由高位回落，更一度跌穿1.5厘，有對沖基金認為喺目前利率仍處於極低水平下，更加需要買入股票對抗通脹，尤其係FAANG五大科技股。喺呢啲龍頭科技股帶領下，隔晚帶動高增長股做好，納指隔晚升逾百點。雖然道指收市跌210點，但港股今日做好，低位有買盤吸納，恒指半日升逾百點。
恒指高開27點報28586，早段一度倒跌26點，見28532半日低位，但低位有買盤吸納，大市止跌回升，最多曾升272點，高見28830，但其後升幅收窄，半日仍守10日線(28717)上，但受制50天線(28733)。恒指半日收報28728，升169點；國指中午報收10618，升28點；恒科指半日升114點，報收8015。
ATMX全線走好，阿里(09988)升1.1%；美團(03690)表現四隻之中最好，升3.6%；騰訊(00700)升0.7%；小米(01810)升1%。不過利率回落，金融股下跌，大笨象(00005)半日跌1.5%；建行(00939)跌0.3%；工行(01398)跌0.4%；友邦(01299)微跌0.1%。油價回軟，石油股今日整體受壓，三桶油跌2.6%至3.9%不等，油服務跌幅閒閒地超過2%。
體品股繼續發力，安踏(02020)發盈喜，獲大行調高目標價，股價半日升5.7%嫌破頂，李寧(02331)破頂升1.3%，其他二三線體品股亦見資金追捧，值得留意係至中午呢批股份升幅收窄，日線圖大部份都出咗長長上影線，成支避雷針頂住，周末效應下，唔少投資者都趁高位食糊套現。
另一個較為矚目嘅版塊係光伏股，其實減碳排呢個方向將持續，加上光伏股較高位回落唔少，估值亦回歸較合理水平，喺資金輪動下，再買入呢個板塊嘅股份亦唔出奇。信義光能(00968)大升8.4%，為表現最佳藍籌，留意暫時14元有支持，阻力大約16元；旗下信義能源(03868)微升0.5%；福萊特玻璃(06865)揚5.5%；協鑫新能源(00451)彈高5.9%；陽光能源(00757)炒高6.7%。
話咁快又過咗一個星期，嚟到星期五，阿Man例牌唔玩貨，反而係睇睇有乜嘢貨夠水位食糊，周末前夕減減榜，暫時大市都係區間上落，既然資金都係板塊輪動，繼續炒住上落先無壞，家下炒股而短不而長，尤其宏觀環境不確定性增加，都係輕倉上路，保持多啲現金喺手，趁大市回調買貨，無謂見升追貨增風險。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。