唔高追出行資源股 寧低撈優質科技股
美股隔晚個別發展，納指跌勢較為顯著，創下去年10月底以嚟最大單日跌幅；而標指則五連跌，係舊年2月以嚟最長跌浪；只有道指轉跌為升，反映資金轉投傳統股懷抱。恒指今早隨美股低開，穿一穿10日線(30316)即反彈回升。恒指低開129點報30189，曾跌193點，低見30126半日低位，跌穿10天線後掉頭急升，最多升456點，見30776半日高位。恒指中午升449點，報收30769點；國指則報收11952點，升58點；但恒科指早段則再跌逾3%，見9637點半日低位後跌幅收窄，中午報收9919點，跌58點。 大笨象(00005)今日派成績表，上半場跟友邦(01299)成為升市火車頭，為恒指貢獻169升幅，兩股齊升3%，但中午大笨象派成績表，去年列賬基準稅前盈利跌34%，派息15美仙；睇嚟呢幾日升幅已反映晒業績同派息因素，下半場可能有獲利盤出現，總之記住50元嘅阻力唔易過，有貨自己執生啦……至於小米(01810)今日表現令唔少米粉唔多happy，半日跌近3%，係表現最差嘅藍籌股。睇嚟小米仲有一段時間要行range，28至32之間，除非有重大利好消息刺激，否則米粉呢期炒住波幅先。其他科技股個別發展，今日邊啲彈得勁，好似好醫生(01833)就反映咗市場資金嘅喜惡，暫時都係大隻重磅嘅較受歡迎，次一線嘅科技股暫時得個守字。 旅遊出行股今日有資金追捧，特首高官一場疫苗show，令市場憧憬疫苗接種後可安安心心出行又出門，濠賭股今日升勢較為顯著，閒閒地升7%以上，龍頭銀娛(00027)最勁，半日升11.2%。航空股亦有資金追捧，升幅由5.3%至一成不等，但真心家下都未曾通關，內地航空股可能仲好少少，但要全球通關都條要觀察一段時間，不過股票炒預期，依家落鑊先炒亦有道理。 資源股繼續吸金，阿Man就繼續食花生，老老實實，雖然有大行叫睇返呢堆資源股，但荒謬嘅係資源股呢兩日急升後，股價已遠遠拋離大行已調高嘅目標價，仲要唔係高出三幾個%，咁搞法現價點追得落手，阿Man就打死唔高追，但永遠唔會阻人發達，有意入場自己衡量風險。與其高追資源或出行股，阿Man寧願吼位撈優質科技股更為划算。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。