商品價格插水 資源股捱沽
美股隔晚個別發展，道指跟標指屢創新高後回吐，納指則持平，美企公布嘅業績，大多交出亮麗業績，但美股喺10月份，人人以為股災之際屢創新高，業績期近尾聲，抖抖氣都好正常。至於港股呢邊真係無眼睇，阿Man都講咗十萬九千次26200至26500阻力大到爆，突破唔到向上，都係繼續行range ，結果又不幸言中，呢幾日又返轉頭，恒指先失10日線(25821點)，不過暫時20日線(25194點)同50日線(25331點)仲守到。50日線係之前多次反彈都未企得穩嘅，今次如果一路企穩，後市又唔會太灰嘅……
恒指高開19點，半升107點至25736點半日高位，但市場缺乏買貨意欲，大市又轉跌，半日曾跌121點，報25507點半日低位。恒指中午報收25604點，跌23點；國指跌32點，報9061點；恒科指逆市向上升0.3%，報6459點。
藍籌股個別發展，百威(01876)派完成績表，上季只係賺多一成，股價半日就升咗5.4%，計落都幾着數。至於明日先公有季績嘅建行(00939)，唔覺唔覺落咗一年低位，咁樣陰跌真係唔多覺，半日跌0.6%，好彩一向阿Man都唔多理啲內銀股，唔係咁畀佢陰乾都幾淒涼。其他重磅股都係咁上下，乏善可陳，難怪有缺邊友話港股開市睇完頭半個鐘，同埋臨收市嗰半個鐘，其他時間可以去瞓陣。
以前炒到出煙嘅商品價格，踏入10月表現麻麻，其中上海期銅連跌八個交易日，動力煤期貨亦錄六連跌，其他商品期貨至少跌兩三日，反映商品期貨沽壓大，而資源股當然難逃一跌。資源股跌幅由1%至超過一成不等，當中以俄鋁(00486)半日跌11.7%最慘情。除咗商品價格回落，油價亦回軟，三桶油跟化工股都跟跌。一直以嚟，阿Man都盡量避開資源股同石油股，呢兩個板塊出咗名難炒，作為一個炒鬼，梗係捨難取易，呢期識炒梗係炒能源股。
新能源跟傳統火力股互相交替地炒作，今日輪到傳統火電股炒高，因為受惠煤價下調，不過講到前景點都係揀新能源股，龍源電力(00916)派咗成績表，股價早段曾高見19.26元，但獲利沽盤下倒跌，又回返去18元水平附近，又係一個撈貨好機會，等啲大行陸續出報告調高其目標價，龍源要重返20元水平再破頂有機會。
恒大(03333)出事後，重貨喺手嘅甘比狂沽恒大，清完恒大呢隻蟹貨，呢個幾星期就狂沽佳兆業(01638)嘅股份。佳兆業畀信用評級機構標普調低信貸評級，更警告未來一年到期嘅美元債再融資存在重大風險，股價半日插15.1%。內房股嘅債務問題一直無解決，仲好似愈爆愈多公司唔掂，就算個別較有實力嘅內房股，現價幾吸引都好，暫時都係咪多手，等市場消化晒啲負面消息，再睇定啲亦未遲。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。