商湯急跌後已內傷 資金離後不復返
美股隔晚假期，歐洲股市靠穩，而國務院副總理劉鶴應約與美國財長耶倫舉行視頻通話，市場憧憬美國快將取消對華關稅，港股今早高開，並重上22000關。不過今早A股高開低走，拖累港股盤一中度倒跌，但中午前收復失地，中午恒指仍升逾百點收市。恒指高開222點，早段一度推升至368點，見22198半日高位，但A股高開低走掉頭向下，拖累港股回軟，恒指曾倒跌22點，見21807半日低位。不過港股市底偏強，低位迅速反彈，半日恒指維持上升。恒指半日升125點，報21955；國指升26點，報7674；恒科指半日升11點，報4895。
藍籌股個別發展，友邦(01299)表現硬淨，半日升0.7%，大笨象(00005)半日升0.8%。科網股亦係個別發展，ATMXJ之中，小米(01810)一直保持大落後，雖然上兩個星期叫做追返少少落後，但14-15元嘅阻力又點過得到，雖然公司發表咗旗艦新機定價3999元，呢個消息一出，股價半日跌咗3%。美團(03690)已淪為大戶舞低弄高指數嘅主要工具，今日港股高開低走，美團(03690)半日亦要跌1.5%。騰訊(00700)雖然被主要股東持續減持，但公司出盡奶力回購，騰訊股價都叫頂得住，半日升0.8%。CCASS顯示有一批數目唔少嘅貨放咗入花旗個戶口，市場開始揣測阿里(09988)主要股東之一嘅軟銀，係咪又部署緊減持，形式會以批股進行，抑或好似騰訊個南非大股東咁，喺市場沽貨，暫時不得而知，但喺主要股東減持陰霾下，阿Man對於阿里始終有忌諱。話咗舜宇(02382)無啦啦升，就可以無啦啦跌，140元阻力無法突破，連跌幾日，今日再跌3.5%，不過盤中落到50日線113元水平好似有啲支持，即管睇多日呢個支持位守唔守得住。
生科股今日繼續有資金追捧，內地上周批准一名美國負責出口管制代表，到江蘇無錫藥明生物(02269)附屬公司檢查，市場憧憬藥明一系公司有機會從「未經核實名單」上除名，另外集團宣布服務能力擴大至微生物發酵領域，藥明生物急升8.1%，藍籌股之中升幅最大。同系藥明康德(02359)亦升逾7%，其他CRO股閒閒地升2%或以上。
近日備受注目嘅商湯(00020)兩日跌逾五成之後，今早一度再跌逾6%，創2.38元上市後新低，但其後反彈，半日倒升近8%。不過阿Man奉勸一句，呢啲飛刀都係咪多手接，皆因唔知仲有幾多機構投資者仲要沽貨，就算呢批貨沽完，喺再無新資金入場下，以難以重返過後高位，而喺公司仍未錄得盈利前題下，亦唔見得有乜嘢吸引力。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。