回調整固又為新經濟股提供上車機會
隔晚美股偏軟，不過尾市跌幅收窄，而今早人行進行逆回購，開展200億元人民幣7天期逆回購操作，按今日到期規模為1000億元人幣，據此計算，單日淨回籠800億元，而上日淨回籠為2600億元人幣。此舉觸發中港股市下跌，今早恒指跌近500點，回補周一所遺下嘅上升裂口，幸而守住10日線(30017)，跌勢漸喘定。
恒指今早低開111點報30483，跌幅曾收窄至105點，見30489半日高位，但人行收水拖累A股下挫，港股受累最多跌495點，回補年初五上升裂口(30184至30497)，之後跌勢喘穩。最終恒指半日報收30335，跌259點；國企指數跌80點，報11960；恒科指中午收10348，跌243點。
藍籌股大致受壓，大笨象(00005)跌2.8%，暫仍守45元，市場觀望下周業績派息能否恢復正常，以及會否從新回購，呢個係支持股價進一步向上嘅關鍵。吉利(00175)半日跌3.4%，係表現最差藍籌股，不過吉利一向波幅較其他藍籌股大，今日跌幾個%，過兩日又可以單日彈幾個%，暫時阿Man對睇法無變，仍然係今年值得中長線持有嘅股份。其他藍籌股乏善可陳，連升幾日，呢兩日調整抖氣亦好合理。
科技股繼續調整，四大藍籌股騰訊(00700)、阿里(09988)、美團(03690)跟小米(01810)齊齊過堂，跌幅由1.4%至2.4%不等。雖然連登契媽剛再增持眾安(06060)，但大行細摩唱反彈建議減持，半日股價急挫近一成，其他契媽股移卡(09923)紅底身份得而復失，半日跌7.8%，新寵平安好醫生(01833)半日跌1%左右，表現尚算硬淨。至於上市後熱炒嘅快手(01024)半日跌近6%，回落至380水平樓下，未有貨嘅缸邊友，呢啲位可以考慮入場，跌穿350止蝕，反正有大行按其市銷率推算，一年目標400-430元不等，既然有止蝕計有數圍，現水平可以博一博，話唔定放行港股通後，北水一入場，單車可以變摩托。
尋日北水淨流入最大金額為中移動(00941)，今日應該得到北水繼續掃貨，支撐其股價逆市升3.6%，其他電訊股亦做好。不過呢個板塊始終唔係阿Man杯茶，莫講話低位提唔起勁買貨，要高追更加無興趣，有貨嘅留意中移動阻力位52至54元，呢幾日唔突破阻力，有貨可考慮食糊。
今日星期五，本來周末前夕傾向唔買貨，但又出現特價時段，回得急嘅新經濟股正好提供上車機會，至於阿Man吼緊乜嘢貨，呢度保持神秘唔公開，跟得呢個專欄耐嘅讀者應心中有數，若然真係想搵答案，當然要加入提供即市策略嘅聊天室。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。