美聯儲局上周議息，言論偏鷹，上周五股早段反彈後尾市回軟，三大指數低至接近全日低位收市，道指跌106點；標指跟納指分別跌9點及12點。由於目前美股估值唔算平，加上空軍喺8月份已回補大部份淡倉，短期難叫資金高位追貨，值博率不足下，標指下試4300支持，資金都係偏向低位儲貨，暫時沽壓唔算嚴重，但留意VIX已上咗17水平，較大幅度嘅調整壓力增加。雖然上周五港股由17500低位急抽，但周五晚夜期已無以為繼，乏力再上，今早恒指進一步回吐，再度失守萬八關。
恒指低開10點，開市價18046已經係半日高位，其後持續向下，半日最多跌288點，見17769半日低位，其後總算頂住17800。恒指中午報收17833，跌224點；國指半日跌83點，報收6178；恒科指半日跌74點，報3916。半日成交額只有379.11億元，雖然上周有傳內地放寛外資對部分A股持股比例上限，以及中美成立經濟領域工作組，以為中美關係破冰，當日有消息指外資大量湧入買A股，其實都係得個吹字，今日睇睇內地及香港股市成交，已經係見到阿爺繼續救市，外資繼續無視。
大型科網上星期五烕咗一日，今日又回復弱勢，京東(09618)半日跌3.5%再創上市新低，攜程(09961)半日跌3%；騰訊(00700)、美團(03690)及網易(09999)全部跌逾2%；小米(01810)半日跌1.3%；百度(09999)跟阿里(09988)跌1%；呢啲藍籌科技股，合共拖低恒指百點，佔大市逾4成跌幅。
金融股亦見腳軟，友邦(01299)半日跌2.4%，平保(02318)半日跌1.9%，兩股已拖低恒指40點；港交所(00388)半日跌0.8%；大笨象(00005)半日跌0.4%，暫時仲叫守喺60元水平之上，已經跑贏好多藍籌股。其他內銀股偏軟，但跌幅低過0.5%，都算係咁。
內房跟物管股又捱沽，龍湖(00916)半日跌4.7%，藍籌之中表現最差，碧服(06098)緊隨其後，半日跌4.4%，其他內房股跟物管股，閒閒地跌2%或以上。至於停牌超過一年嘅中國奧園(03883)，復牌半日跌逾七成，其他債務沉重嘅內房股，顯著下跌，世茂(00813)半日跌一成，其他碧桂園(02007)、融創(01918)跟富力(02777)半日跌半成以上。恒大系全線插水，集團原定本周舉行的債務重組會議取消，加上恒大地產暫無法發行新票據，中國恒大(03333)半日急挫25%。恒大汽車(00708)跌21.1%；恒大物業(06666)跌11.5%。
上周傳內地考慮放寬外資對部分A股持股上限，即使傳聞屬實，但亦都要留意外資係咪有意重新入場增持A股，暫時就唔多覺再有新資金入場，無成交支持，只係不斷打嘴炮，阿爺繼續用把口救市都係徒然。暫時恒指宜守上月低位17500，不過再失17800嘅話，除咗再考驗17500上周低位，亦有機會下試去年17300裂口，反彈阻力18000及18200，上唔返去，港股都好難有得彈。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。