多事之秋 少做少錯 唔做唔錯
上周五美股反彈，但未有帶動港股喺第四季首個交易日做好，反而因為多個利淡消息而引來沽壓，有消息指美國或宣布再增內地關稅，加上內地電荒問題，及恒大(03333)事件困擾下，第四季開局未如理想。雖然喺北水未回歸下，半日成交只有661.95億元，但指數半日跌逾2%，10月一向係傳統股災月，雖然喺過去十年，港股喺10月份只有兩成時間下跌，但一係唔跌，一跌通常都係跌鑊甘，尤其第三季港股已明顯轉弱，嚟到第四季缸邊友更加提高警覺。
恒指低開96點，報24478點已經係半日高位，開市後跌幅持續擴大，一度跌667點，見23908點半日低位，其後喺24000點水平喘定，中午報收24022點，跌553點，險守二萬四水平。國指則跌212點，報8514點；恒科指失守六千大關，半日跌119點，報收5982點。
藍籌股未至全軍覆沒，恒地(00012)跟百威(01876)半日逆市升0.7%及0.4%，但其他藍籌普遍下跌，當中跌最多係藥明生物(02269)，半日跌7.8%。市場憂慮美國默克藥廠嘅治療covid-19口服新藥對疫苖帶來衝擊，相關疫苖藥股全線下跌，藥明生物跌唔夠8%已算溫和，其他疫苖股跌兩成或以上，當中復星醫藥(02196)跌近兩成，康希諾生物(06185)、開拓藥業(09939)及騰盛等，全部急挫愈兩成。
除咗陷入財因嘅恒大(03333)跟恒大物業(06666)隻隻停牌之外，另二內房股合生創展(00754)亦停牌，有消息指合生創展有意收購恒大物業51%股權，已恒大將失去恒大物業控股股東地位，而交易金額或超過400億元。不過恒大即使成功出售恒大物業控股股權，呢400億都係要嚟還債及應付流動資金需求居多，恒大最終命運如何，暫時仍懸而未決。
不過合生收購恒大物業嘅消息，令其他內房股及物管股獲得支持，合生可以出手400億買恒大物業，即係內房股並非個個都缺水，恒大事件未引發整個產業鏈出現資金緊掘問題。而物管股亦有價有市，難怪物管股逆市向上。
雖然仍有個別板塊逆市向上，但內地仍未復市，而中美貿戰或有可能再度升級，睇嚟呢個10月都係多事之秋，暫時都係少做少錯，唔做唔錯，阿Man選擇多持現金，待情況較為明朗再作定奪。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。