大市二萬爭持 期結前暫無方向
雖然聯儲局議息會議紀錄反映對加息立場不變，較為進取，嚟緊幾之加息可能都要加50個點子，不過市場之前一度擔心為咗壓抑通脹，嚟緊議息每次要加75個點子，變想噚日份議息紀錄已算溫和，美股隔晚三美指數早段下跌後，收市倒升。港股今朝曾隨美股高開，可惜缺乏資金入場下，反覆回落，上半場更一度跌穿20000 大關。
恒指高開100點，報20272，亦係半日高位所在，暫受制10日線(20283)及20日線(20287)匯聚區。甫開市已升勢不保，更一度失守20000大關，跌280點，見19890半日低位。不過A股回升，港股跌幅亦收窄，20000點失而復得。半日恒指報收20145，跌25點；國指跌11點，報6887；恒科指則升10點，半日報收4054。不過半日成交額532.42億元，維持買賣兩閒局面，下周一期指結算，大市方向未明，缸邊友無心戀戰。
噚日大市靠大笨象(00005)一股頂住半邊天，今日大笨象維持半日升0.4%，其他本地銀行股普遍做好，但內地金融股就腳軟，表現麻麻。重磅股普遍下跌，尤其ATMXJ呢五隻佔咗恒指比重25%嘅重磅科網股，全線腳軟，幾件巨頭都無厘精神，個市又點升得起。雖然阿爺對科網股嘅監管已暫告一段落，但已撤離呢個板塊嘅資金唔肯入返場，講到底都係信心問題。
即使中證監已多次表示跟美國就審計問題已積極溝通，但溝通還溝通，一日未達成共識，又或者咁講，人哋要求嘅係審計底稿，總之就要符合人哋要求，先可以保持上市地位，咁中概股未能達到美國審計要求，人哋自然有權撤銷你哋上市地位。喺呢個陰霾未除嘅情況下，試問市場資金，又點會有信心重新入場。呢個亦係科網股反彈到某個水平，未能進一步突破嘅原因，咁呢一堆科網股，對於恒指嚟講又舉足輕重，佢哋升唔起，大市亦無運行。之不過阿爺又唔想大市跌得太難睇，三日唔埋兩日就出出口術，扮下要救市咁嘅態度，淡友當然亦未敢太過放肆，所以就造成港股唔上唔落，暫時喺20000水平爭持嘅局面。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。