大市仍反覆 後市好壞睇騰訊
地緣政治局勢緊張，加上美國零售數據欠佳，加上市場憂慮聯儲局提早收水，最快可能9月開始縮減買債，而稅率亦有上調可能，加上通脹升溫，令美股走勢愈趨波動。美股隔晚早段受壓，道指最多跌505點，收市跌幅收窄至282點，美股波動性加劇。至於港股跟美股關連性愈來愈低，雖然美股隔晚走軟，但港股已連跌四日，今日未有跟美股走軟，反而跟A股靠穩而反彈。
恒指高開恒指高開54點，開市無耐倒跌36點，見25708點半日低位後反彈，盤中曾倒218點，見25964點半日高，但暫受制二萬六，又係支持變阻力。恒指中午收報25938點，升192點；國企指數報9164點，升106點；恒科指升30點，報6249點。
藍籌方面，騰訊(00700)今日收市後派成績表，早段受壓曾低見430元，但低開後反覆回升，半日升1.8%，半日升幅收窄至0.3%。騰訊後市表現將直接影響大市升跌，不過只要騰訊業績穩穩陣陣，以其目前現價21倍市盈率，又確實唔算貴，阿Man雖然認為內地監管令科網股短期無運行，但現水平嘅騰訊再大跌風險亦有限。同樣今日公布業績嘅吉利(00175)半日升0.2%，留意吉利過往公布業績，跟市場預期常有出入，如果未有貨喺手，業績前不宜輕舉妄動。至於明日除淨嘅大笨象(00005)，半日跌0.6%，大笨象已經無做股王好耐，過往財息兼收日子不再，除淨與否，都唔係入貨嘅理由。
中資金融股相對強過大笨象多多聲，招行(03968)半日升6.6%，其他內銀股同內險股全線向上，普遍升幅超過2%，但都唔夠中資券商厲害，當中廣發証券(01776)半日升8.4%，其他中資券商股，閒閒地升4%以上。不過中資券商股升勢通常短癮，呢啲環境都係食花生算，無謂追貨，一追入分分鐘又要坐艇。
港股暫時仍然反覆，資金繼續喺唔同板塊之間輪動，但成交額未見增加，上月底大成交跌市，流出資金估計唔會短期內重返港股市場，塘水滾塘魚，港股都叻唔到去邊，繼續打游擊以短線操作為主，大部份股份表現反覆，高沽低買，唔好高追，嚴守止蝕，保本為上，仍然係近日最佳策略。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。