大市仍未穩暫未宜入場
俄烏兩個雖然舉行第三輪會談，但雙方未能達成任何共識，戰事持續，隔晚美股三大指數以全日低位收市，納指更跌逾3%，表現極為疲弱。港股兩日跌咗1409點後，嚴重超賣下應有反彈，可惜A股拖累下，高開低走，恒指更倒跌逾百點，恒科指則再創成立後低位。恒指高開24點，半日最多升245點，見21303，可惜A股唔爭氣，港月股受累由升轉跌，一度跌160點，見20896半日低位，不過20800點有似乎有啲支持，終見喘定。恒指半日報收20961，跌95點；國指報7312，齊頭跌100點；恒科指半日跌75點，報收4451。
整體藍籌股表現強差人意，只有大笨象(00005)叫彈咗1.5%，友邦(01299)半日跌1%，75元都穿埋，真係無眼睇，其他金融股亦下跌。大宗商品價格隨油價飊升，小麥期貨隔晚創新高，或影響啤酒股生產成本，百威(01876)半日跌3.7%，華潤啤酒(00291)跌幅更大，半日跌近6%。
科技股真係無運行，兩會非但無利好呢個板塊嘅消息，最高人民檢察院工作報告提出，今年檢察機關將加強反壟斷、反暴利、反不正當競爭司法，科技股普遍繼續受壓，向下尋底，只有阿里(00988)跟美團(03690)半日反彈1.5%及1.9%，但彈力跟跌幅唔成正比，噚日阿里單日已急跌超過一成。京東(09618)本來係ATMXJ之中較為硬淨嘅，今日都頂唔順，半日跌近半成，失守240支持位。小米(01810)跌穿15大升浪嘅起步突破點後未彈過，半日再跌逾2%，暫時仲未搵到個底。其他科技股普遍下跌，跌幅超過半成嘅有，創上市後新低嘅都有，總之衰嘢乜都齊。
資源格價急升，作為電池嘅主要材料鎳，上日狂升七成八，或打擊相關電池製造商生產成本壓力急升，比亞迪(01211)跌穿200元大關，半日大跌8.3%，為表現最差藍籌；擁有整條電池產業鏈的贛鋒鋰業(01772)，股價半日更跌近一成。
地產股半日逆市反彈，原因係禁追租3個月後不額外延長，不過講真喺目前社交距離措施嚴峻下，即使未實行禁足檢測，市面上早已一片蕭條，喺疫情仍然肆虐下，地產股跟收租股都有排捱。
講真，雖然個市累跌咗超過四千點，睇落好多股票都跌咗好多，平咗好多，但喺市況仍未穩定下，加上戰況持續，咁多不明朗因素困擾下，依家一動不如一靜，忍一忍手，待情況穩定後先入場。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。