大市再向上突破需成交配合
市場對變種病毒Omicron對經濟影響憂慮減少，加上人民幣進一步走強，人民幣中間價升至三年半高位，官方中間價今早報6.3498，較上日上升179點子，創2018年5月15日以嚟高位。港股半日做好，恒指半日升逾300點，半日企穩24000，恒科指升幅更顯著，半日升逾2%，重返6000點大關。恒指高開171點，報24168，開市後升幅曾縮至156點，見24153半日低位。去到低位又見買盤吸納，帶動恒指升幅再擴大至327點，見24324半日高位，臨近中午收市時回順。恒指半日收市升213點，報24210；國企指數報8642，升119點；科指漲122點，報6092。可惜大市半日成交708.56億元，唔足夠配合升勢。
藍籌股普遍向好，即使表現最差嘅長建(01038)都只係跌0.8%；友邦(01299)半日跌0.2%；大笨象(00005)半日跌0.4%。其他藍籌股均見進帳，ATMX今日終於全部齊齊升，騰訊(00700)跟美團(03690)半日分別升1.2%及1.1%；阿里(09988)反彈1.8%，但距離130元阻力仍有段距離；小米(01810)半日升0.6%，廿皮業績前嘅大支持位，變成遙不可及嘅距離。反而阿Man呢期偏愛嘅京東(09618)，半日彈返1.4%。石藥(01093)為半日升幅最大藍籌，半日升5.4%。而呢期跑贏大市嘅港交所(00388)，半日再升0.1%，都叫做抖抖氣。
家電股今日表現唔錯，之前阿Man喺另一個平台聊天室推介過嘅海爾智家(06690)半日升3.7%，由推介日28-29元水平入場計至今，累積升幅超過一成，喺近日飄搖嘅市況中，算係穩打穩紮嘅選項。至於半日升得最勁嘅家電股係創維(00751)，呢部電視機半日急升兩成，忽然爆升一下勁，又真係估佢唔到。其他家電股升幅由1.8%至8.1%不等。
電力股延續噚日升勢，龍源電力(00916)獲核准收購內蒙古平莊能源，半日飆5.9%，盤中更一度重越18元水平，不過18元唔少蟹貨等緊鬆綁，要企穩18元似乎仲要啲時間。其他電力股又係火電股表現更勝一籌，相關火電股半日升1.9%至近8%不等。
大市暫時仍然喺反彈路上前行，恒指喺24500水平阻力頗大，要突破需要更好消息及成交配合，否則大市仍保持上落市格區，暫時大市移動區間喺23500至24500點，希望能早日突破24500，移動區間可上調一級，而要做到呢一點，真係要更大成交去配合。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。