大市反彈忍手 反覆市況待下跌日入場
美股隔晚做好，納指再創收市新高，加上內地A股保持勇猛，港股今日繼續反彈，恒指曾升近500點，國指更一度重上9000點大關，恒科指則升272點，升幅超過4%。恒指高開319點報25428，早段升幅曾縮至252點，見25361點半日低位。不過A股走強，港股回勇，推動恒指最多升493點，見25603半日高位，但投資者始終較為審慎，大市升勢放緩，恒指中午收報25501，升392點；國指升176點，報8992；科指升272點，報6293點。
科網股成為大市主要動力，ATMX回勇，要挾淡友梗要有佢哋幫手，美團(03690)半日升近一成，藍籌之中最升幅大；騰訊(00700)半日升4.6%，企得穩450，下個位向住470-475出發，但唔重上500元，騰訊都未叫做轉勢，只可視為反彈。至於阿里(09988)練足九日九陰真經，今日終於識反彈5%，噚日阿Man話希望150心理關口有支持，高位坐咗潛水艇都無謂喺現水平打靶，果然守到150元，不過阿里要重見天日，條件係旗下螞蟻完成整改後，再從新啟動IPO，否則要重返雙紅底股有難度。其他科網巨企都有不俗反彈，半日升幅超過半成比比皆是，尤其京東(09618)系表現最理想，其季績超預期，而集團表示監管風暴下，京東反成為「二選一」嘅受益者，喜見客戶回流，睇嚟呢期可以跑贏阿里巴巴。
濠賭股經過呢半年日復日跌，整個板塊嘅股份，閒閒地跌五成後，今日終見曙光，澳門周三零時起，將放寬經廣東入境當地嘅澳門核酸檢測陰性證明，由現行須持有48小時內有效證明放寬至7日內，經其他口岸出入境的人士嘅檢測要求則維持不變。澳門有望吸返一批廣東客，濠賭股今日整體見反彈，平均升幅有半成以上。不過都係嗰句，家下市況仍然反覆，寧願等大跌市之際人棄我取，而唔好反彈升市嗰日嚟追貨，呢個策略，邊一個板塊都適用。
睇返電力股噚日炒到出晒煙嘅火電股，忍唔住噚日高追，今日又要捱價，不過相對噚日急升，今日回吐壓力唔算大，尤其有涉獵新能源嘅電力股，好似華潤電力(00836)咁，半日都係回1.4%，不過始終呢個板塊累積升幅唔少，就算呢啲位再回多幾個%亦好正常，今日首見回吐，想撈貨睇多兩日再決定無壞。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。