大市回吐可收集重磅科網股
美股連續兩晚先升後回，隔晚更結束前兩日升勢，主要係因為獲提名出任美國聯儲局副主席嘅現任理事布雷納德表示，當局最快下月開始「迅速」縮減資產負債表，市場對收水再感擔憂。另一方面，俄烏局勢轉趉緊張，歐盟決定對俄羅斯展開新一輪制裁，市場避險情緒升溫。恒指假期前兩日彈逾500點後，今早見回吐。
恒指低開282點，盤中最多跌472點，見22029點半日低位，暫時22000水平似有支持，其後跌幅略為收窄。中午恒指報收22181，跌320點；國企跌117點，報7653；恒科指中午報收4618，跌151點。北水今日回歸，半日成交增至706億元，口痕友話多得北水唔少，放完假就返嚟沽埋一份。
藍籌股偏軟，大笨象(00005)跟友邦(01299)半日分別跌0.6%及1.2%，加快加息步伐都幫唔到手，皆因市場依家開始擔心滯脹，一旦經濟衰退，滯脹發生，對金融股嚟講當然唔係好事。兩隻藍籌體品股亦顯著下跌，安踏(02020)半日跌4.3%，李寧(02331)更跌6.2%，市場憂慮內地疫情反覆影響消費，但阿Man認為天要落雨，娘要嫁人，股價跌咗咪搵個理由去解釋，其實有資金流走，買貨力量唔夠沽盤強勁，股價就算然下跌。兩股包辦藍籌包尾同尾二位置。雖然油價喺亞洲時段今日稍稍回落，但無礙石油股逆市走強，半日中海油(00883)與中石油(00857)分別升4.9%和2.7%，成為藍籌之中表現最佳兩股。
雖然內地對於美國上市中概股有關配合美國審計標準作出讓步，但暫時未見美國方面對企業肯鬆一鬆手，加上避險情緒升溫下，通常都係向科網股先開刀，是日呢個板塊難免捱沽。而一向彈得最快嘅京東(09618)，半日跌4.5%，跌幅較ATM大，不過阿Man就認為京東落返嚟230元水平呢啲位，又可以收集一下，唔趁回嗰日買，唔通又等升嗰日嚟追咩。美團(03690)又回到160水平，只要守喺160元之上，要重上180元至200元指日可待，依家呢啲位又博得過，短炒咪睇住條10日線154元做止蝕參考，計落都 有數圍。
阿Man都講過，雖然航運費仍高企，但高位見咗，今年餘下時間最多高位橫行，甚至要高位回落，航運股最風光日子過咗，之前嘅累積升幅，亦已足夠反映航運股嘅升幅，所以呢個板塊都炒完，有貨要睇住食糊。結果喺波羅的海乾散貨指數(BDI)連跌九日，累計大跌14.1%，今日航運股沽壓大，閒閒地跌半成。
內地各省市陸續放寬房地產限購政策，蘭州計劃推二套房首期只需三成，內房物管股逆市有買盤吸納，雖然早段隨大市低開，但其後升幅收窄，甚至倒升收市。阿Man喺過去一個月已多番強調，內房跟物管股最壞時間已過，可以搵板塊中嘅優質股收集，而其中財務狀況較穩健，資金流健康嘅碧桂園(02007)跟碧桂園服務(06098)，一直係阿Man心水。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。