大市已接近反彈尾聲 現水平入場小心又成韭菜
隔晚美股反覆回升，美股喺現水平日升日跌，叫人無所適從，不過喺10年期債息再次逼近3厘水平，美股仍未見掉頭回落，反映市場流動性仍相當充裕。至於港股呢邊，再有內地國產網絡遊戲通過審批獲得版號，市場憧憬內地對科企監管正式告一段落，港股喺一眾重磅科網股帶領下，一度挑戰22000關，可惜未能企穩。
恒指高開257點，其後升幅擴大至486點，高見22018，可惜22000關未能穩守，得而復失，半日升幅放緩，加上A股回軟，半日恒指升366點，報21897；國指升153點，報7621；恒科指曾升逾半成，半日升幅收窄至3.4%，收4754點，升155點。半日成交額增至1000.93億元，股價升咗咁多，成交額上升亦好正常。
藍籌股主要係科技股表現最突出，單單ATM三寶已為恒指提供255點升幅，阿里(09988)半升8.1%，成功企穩紅底；騰訊(00700)半日升4.7%，但未有耐到100日線，相對落後，之後個市要更上一層樓，應該都要靠佢再下一城；美團(03690)以為佢升抵200元無以為繼，進一步升3.6%，目前企穩雙紅底。其他科網股表現強勁，阿里健康(00241)半日升8.8%，藍籌股中升幅稱冠；嗶哩嗶哩(09626)獲批新版號，半日急升15.3%，心動公司(02400)旗下遊戲亦榜上有名，半日升4.6%，其他科網股閒閒地升3%以上。
不過並唔係所有藍籌股都跟住個市向上，內銀股仲係無厘神氣，內房股亦繼續跑輸，逆市下跌。大笨象(00005)半日跌0.2%；友邦(01299)則穩守80元之上，半日升0.8%。除咗科網股今日表現出色，生科股阿Man話反彈升勢料可持續，今日果然繼續向上，整個板塊升幅至少超過半成，個別股份升幅更超過一成。
個市由20000邊開始抽升，至今日升抵22000水平，足足升咗一成，之前阿Man講過升到22000會遇到較大阻力，而22000至22500點更有可能係反彈升浪嘅終點，暫時維持呢個觀點不變。雖然唔少坊間聲音認為港股有機會扭轉弱勢，重新步入牛市，不過阿Man維持大型上落區間睇法不變，只係波動區間再上移，由之前19000至21000，略升一級至20000至22000，除非有大量新資金流入市場，否則喺接近移動區間頂部嘅呢一刻，先嚟入市追貨，小心又成為韭菜被割。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。