大市急升後整固 儲力守穩支持再向上
美國就業數據表示好過預期，帶動美股道指連升四日，不過美期喺亞洲時段回吐，港股連續兩日升逾3000點後，亦見回吐，半日回吐逾500點，21000大關得而復失。恒指低開268點，跌幅曾收窄至211點，見21289半日高位，周末效應下沽壓增加，半日最多跌578點，見20922半日低位。中午恒指報收20988，跌512點；國指報收7166；半日跌241點；恒科指半日跌255點，報收4317。
藍籌股普遍回吐，早兩日彈得愈多嘅股份，今日當然回得較急，京東(09618)跟美團(03690)半日分別跌9.2%及8.3%，不過早兩日夾埋彈咗三四五成，回返嗰一成唔夠都唔過份。騰訊(00700)、阿里(09988)跟小米(01810)分別跌4.4%、6.6%及5.9%。有意將本港上市地位，轉為第一上市嘅嗶哩嗶哩(09626)，呢兩日勁彈五六成，今日回返16.6%，應唔算啲乜嘢。其他科技股普遍回半成或以上。百度(09888)半日升2.9%，成為逆市奇葩，亦係最大升幅恒科指成份股。
其他藍籌股回吐幅度較細，跌幅由0.5%至近一成不等。跌最多嘅係噚日升得最勁嘅碧桂園服務(06098)，半日跌近一成，其他物管股回吐力度亦較大，反而內房股跌幅細得多。不過阿Man認為內房股已見咗底，尤其阿爺考慮放鬆內房股調控，更有消息指內地有機會減息，阿Man都仲係捕住碧桂園(02007)，早兩日插水去到PE不足2倍，PB落到0.4，唔買等幾時，當日已叫收費聊天室嘅手足上晒車，家陣贏住幾成嚟坐，當然可以坐得舒舒服服，得呢個板塊大翻身。
本地疫情似已見頂，雖然專家指確診數字可能喺高位維持一段時間，但終歸都會從高位回落，市場已憧憬好快會逐步放寛社交距離措施。講真，暫時社交距離真係無乜條件放寛，但本地地產股就已偷步逆市向上，呢啲情況又撞正周末前夕，做吓觀眾算數，可必要入場博周末外圍不確定因素，可能又引起動盪。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。