大市暫已反映負面因素見底可彈
變種病毒對美股嘅殺傷力，遠遠不及美國聯儲局主席一句話提早收水，隔晚美股又插水，三大指數跌逾1%，不過喺亞洲時段，美期反彈，港股今日終於識得彈，三日插水1264點後，今早高開高走，半日彈返三嚿幾。恒指今早高開120點報23595，財新中國11月製造業PMI雖然差過預期，但市場憧憬內地會推措施谷經濟，可能有機會放水，內地股市死唔去，港股升幅擴大。恒指半日最多升382點，見23857半日高位後回順，暫時喺23800點水平穿梭。中午收市升329點，報23804；國企指數報8496，升127點；科指升64點，報收6092。
美團(03690)績後跌咗三日，今日卒之識反彈，半日彈近4%，話咗喺240樓下有得博。另一隻阿Man噚日講過可以博反彈嘅係騰訊(00700)，作為指數龍頭，大市反彈，騰訊一定無失拖，半日升2.2%。不過阿里(09988)仍然疲弱，半日再跌1.5%，ATMX之中至曳係佢。至於半日彈得最勁嘅藍籌股係創科(00669)，升近4%。鮑爺話提早收水，意味息率再有機會趨升，銀行股造好。
洗米華事件對濠賭股打擊甚大，太陽城(01383)稱旗下貴賓廳全線關閉，消息拖累濠賭股跑輸大市，貴賓廳佔比多的永利澳門(01128)，中午大跌7.1%；金沙(01928)挫3%；銀河娛樂(00027)也挫3.9%，成表現最差藍籌股。不過已有大行表示近日呢個板塊會較大波動，但現價已足夠反映太陽城事件以及疫情反覆兩大負面因素，暫時呢啲位應該差不多，但想買呢個板塊，都係再觀察多一陣，忍忍手唔使急。
昨日有報道指內地氫能產業發展規劃近期有望公布，中港氫能源股落鑊，中集安瑞科(03899)連升四日，今日半日升2.4%。而其中專業氣瓶生產企業之一嘅京城機電(00187)爆升12%；華眾車載(06830)盤中創上市新高，半日仍升一成；持有加拿大氫能企業巴拉德動力股權的嘅濰柴(02338)，股價大升8.7%。
至於之前熱炒嘅電子煙股，龍頭思摩爾(06969)半日跌5.8%，因為中國計劃規範電子煙產業發展，將就電子煙制定國家標準，並擬在發布後3至5個月正式實施，但暫時無講話會包括埋加熱煙(HNB)產品，睇嚟思摩爾嘅炒作都要告一段落。不過阿Man推介都贏咗一成過外，目標50元亦超額完成，有跟買嘅都飽餐一頓，暫時都唔使再理住。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。