大市暫無方向 缺水流入暫難突破
隔晚美股個別發展，以納指表現較佳，有資金追捧重磅科技股，市場靜待通脹數據，以反映通脹路徑，以及預測聯儲局下周議息貨幣政策方向。港股已連跌五日，但仍未多肯反彈，主要係無成交配合，半日成交額只有621.5億元，
恒指低開10點，其後曾跌89點，見28692點半日低位後回穩，倒升最多78點，見28859點半日高位，半日收市前回軟。恒指中午收報28762點，跌19點；國企指數報10716點，跌12點；科指創兩周低，半日跌19點，中午報收7961點。
國家統計局公布，5月份全國居民消費價格指數(CPI)按年升1.3%，升幅較上月擴大0.4個百分點。工業生產者出廠價格指數(PPI)按年升9%，漲幅並為2008年9月以來最高水平。反映通脹正升溫，不過內地股市未受影響，滬指半日亦保持上升。
美國對伊朗制裁仍未放鬆，市場預測石油供應未能增加，令油價繼續走強，「三桶油」半日升2.2%至2.9%。本地地產股亦做好，近日疫苗接種人數節節上升，社交距離限制有望逐步放鬆，經濟可加快回復，地產股有資金追捧亦正常。表現最差藍籌為阿里健康(00241)，半日再跌3.8%，繼續其尋底之旅。雖然阿里健康自染藍後，股價跌咗唔少，但暫時未見有見底回升訊號，都唔好懶醒估底，未宜買入博反彈。
物管股今日表現突出，同股唔同命，碧服(06098)染藍後股價未見回軟，高位徘徊；但今日較受資金歡迎嘅，反而係二線物管股，升幅閒閒地超過4%至近一成，反而一線物管股行得漉啲。二線物管股中，阿Man會揀合景悠活(03913)，睇好佢未來商業物業管理比例增加，以及有併購潛力。
至於內需股就個別發展，康師傳(00322)除淨，股東財息兼收，半日升4.2%，但乳業股則個別發展，中國飛鶴(06186)半日挫7.4%，集團中午公布擬動用不超過2億美元資金用於購回股份，回購消息只能保住股價喺250日線以上，但未見有太多資金博反彈，暫時都係先觀察，即使其基本因素不俗，毛利率亦優於同業，但刻下技術走勢偏弱。蒙牛(02319)半日升逾5%，係表現最好藍籌股，留意47-48阻力唔細，有貨喺手睇住落車。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。