大市表現仍反覆 現水平買貨欠值博率
5月3日，大致天晴，天氣乾燥。隔晚美股早段承接上周五跌勢，三大指數低開，道指更一度跌逾500點，不過收市前三大指數收復跌勢並倒升。不過標指跟納指已先後跌穿3月份低位，而日升日跌大幅波動，係典型熊市走勢，每次反彈正正係投資者減磅或者逃生機會。
美股業績期已有過半數標指企業公布業績，當中超過五成企業每股盈利業績較預期差，平均盈利增幅只有3%左右，遠低於預期嘅7%；至於納指100大企業之中，接近五成已公布業績嘅企業，盈利平均更錄得逾5%倒退，亦遠低於預期增長0.9%。美企業績不如預期，加上目前美股估值並唔便宜，係美股近日下跌嘅原因，犮其當10年債息已升抵3%之際，高估值嘅科技股盈利長動力大不如前，相對吸引力大大下降，一旦債息進一步向上，恐怕高增長股沽壓更大。
明晚又到美國聯儲局議息，市場預期是次議息將加息0.5%，6月跟7月甚至加息0.75%，至年底息率缃升至2.75%。不過喺美息上升之際，較早前公布嘅首季GDP竟然意外地倒退1.4%，反映美國已陷入滯脹危機。正正因為美國經濟或陷入衰退，聯儲局可能要改變貨幣策略，屆時倒轉又炒放水嘅話，債息回落，美股或有機會扭轉跌勢，向返上炒，但暫時美股都係反覆向下。
至於內地經濟同樣不濟，人家美國加息之際，中國卻要放水，除咗減息降準，但針無兩頭利，減息降準只有加速資金外流。不過阿爺眼見中港兩地股市表現不振，開始喺政策上提供支援，包括狂谷基建救經濟，同時亦喺監管方面開始放鬆，意圖為兩地股市注入動力。只係股市最大動力始終係資金，一日未見有大量資金投入，每次嘅反彈力度只會減弱，進一步消耗市場購買力。
而港股上周五又見異動，近期每次北水缺席，港股反而有運行，上周五傳出中美就審計談判有進展，加上監管方面或進一步放鬆，消息帶動下，重磅科技股上升，恒指更重上21000水平，而成交額更增至超過1600億元。只係呢個額度嘅成交額未知能否維持，若然只係虛火一度，本周成交又打回原形，回落至1300億樓下嘅話，港股升勢亦難以持續，現水平追貨值博率唔高，唯有等待下一次低位再入場。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。