大市重上萬八企穩成交配合挑戰萬九
美國聯儲局又有委員放鷹，美股隔晚三大指數偏軟，下跌1%，不過反映中概股嘅金龍指數逆市向上，隔晚夜期跟ADR已經偷步炒上，港股今日高開高走，盤中一度升701點，暫受制於萬八大關。恒指高開260點，升幅曾縮一縮至238點，見17536半日低位，但隨即高開再高走，愈升愈有，最多升701點，見17999，雖未破萬八，但呢一關應該唔難過，反而18200-18400阻力較大。半日恒指報收17964，升666點；國指升276點，半日報收6149；恒科指最勁，半日升185點，升幅超過半成，中午報收3619。半日成交額增至826.4億元，嚟到呢啲位，資金仍然肯買貨，暫時後市仲可以睇高一線。
藍籌股半日整體做好，友邦(01299)半日升4.2%，港交所(00388)更勁，半日升6.1%，但講到金融股最強係平保(02318)半日升一成，大笨象(00005)最水皮，半日僅升0.6%，至於內銀股今日有資金追捧，但絕對吸引唔到阿Man追貨，最近由幾大國有銀行扯頭纜救內房，向內房揼水，阿Man會視為內銀救人救己行動，畢竟內銀係內房最大債主，內房失救，內銀渣都冇，依家出資打救佢哋，雖然數目遠比所有隱藏負債相距甚遠，但有助內房增強流動性，buy time 先等個樓市慢慢好返。內房股要扭轉乾坤，始終都要靠樓市回暖，銷售回升，內房先可以真正走出困局。內房跟物管股因為得到中證監出台支持房企的五項措施，恢復涉房上市公司併購重組及融資，短暫都係對呢批股份有刺激，都係嗰句，追貨免問，免得又做韭菜。
反映中概股嘅金龍指數做好，今日科網股精神，整個板塊向上，因為被騰訊(00700)送股嘅美團(03690)早兩日走弱，即使交出理想業績，噚日都要跟個市低開，但落到130嘅美團，再重現，即吸引大量買盤掃貨，今日隨大市回升，半日升8.1%，ATMJ之中表現最好。其他科網股閒閒地升接近4%，阿里健康(00241)成功扭虧，半日升近一成。
大市噚日都講到明，只要20日線(17182)，50日線(16951)都守得住，後市仍有條件向上挑戰，而20日線今日已順利升穿50日線，第二個黃金交叉出現，只要呢一轉重返18000，再向上突破18400嘅前高位，100日線(18448)成功突破後，下一個目標自然係19000，但留意成交要配合，最好每日做到1200億或以上。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。