大市長假前例靜 成交萎縮區間上落
美國隔晚公布咗3月CPI創逾40年新高至8.5%，不過撇除能源及食品的核心CPI按年升幅為6.5%，略低於預期，10年債息由2.83%回落至2.67%，美股早段借勢高開，可惜高位缺乏承接，加上三大指數本身走勢已開始轉弱，最終三大指數倒跌收市，標指跟納指更已連跌3日。有分析指目前美國嘅科技股走勢似足1999年下半年，準備出現科技泡沫爆破。事實上納指每日波幅高達2%，已預示步入熊市階段。大家要小心提防美股嗰邊有乜冬瓜豆腐，全球所有股市都唔會有好日子過。
至於港股今日表現反覆，恒指早段隨美股轉升為跌而低開126點，半日最多跌178點，見21141低位，其後止跌回升，最多升86點，見21405半日高位。恒指20日線拉升至21681，暫時仍有一段距離，受制20日線後升勢放緩，但半日仍維持上升。恒指半日報收21352，升33點；國指升35點，報收7300；恒科指半日升6點，半日收4255。
藍籌個別發展，ATMXJ表現好壞參半，股神巴菲特老友芒格早前減持阿里巴巴(09988)表現較為疲弱，今日再跌1%。小米(01810)亦已持續弱勢一段時間，今日繼續無乜睇頭，半日跌0.16%。京東(09618)跟騰訊(00700)半日升2%，前者喺ATMXJ中呢期都跑贏，京東呢期係阿Man心頭好，不過留意要230元企得穩先仲有得上。騰訊雖然今次無新遊戲獲審批，但重啟手遊版號審批係一個好嘅開始，今次無份，總有下次，呢個消息可以支撐到股價一段時間。港交所(00388)半日跌1.4%，股市成交萎縮，生意淡薄，IPO亦冷卻落嚟，港交所暫時都無運行。
資源股表現突出，主要係資源價格隔晚向上，煤炭股維持強勢，略為調整後，今日又炒高，兗礦(01171)跟中煤(01898)齊齊升逾6%。其他金屬資源價格亦向上，金銀銅鐵呢啲股全部有資金流入，相關股份半日升幅普遍有4%以上。雖然有指受經濟可能陷入衰退威脅，對石油需求可能減少，但油價仍然高企，中石油(00857)半日升3%。
美國10年期債息一度升穿2.8厘，雖然其後略為回落，但高估值或無盈利嘅股份沽壓較明顯。生化科技股今日沽壓沉重，即使係龍頭嘅藥明生物(02269)跟信達生物(01801)分別跌3.2%及2.1%，已經算跌得少，其他生貨科技股跌最低消費跌4%以上，個別股份更跌逾一成。
大市方面唔上唔落，暫時受制20日線，但下面20800-21000應該有一定支持，唔上返20日線又好難突破22000，睇嚟都係區間上落，尤其嚟緊有復活節長假，今日半日成交額僅僅夠500億元，全日應勉強過千億元，咁嘅成交額唔上唔落，呢兩日一動不如一靜。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。