大市雖反彈 但仍未擺脫上落格局
聯儲局議息會議維持息率不變係意料中事，但暫時維持資產購買力度不變，亦無任何對美債進行扭曲操作提示，即沽短債買入長債以遏止10年債息上升，但鮑爺對此未有表示，10年期債息仍然高位。不過市場開始接受債息趨升，只要唔係急升，喺通脹升溫預期下，今年內10年期債息升至1.8-2厘水平機會甚大，問題係唔可以升得急，等市場可以接受。只不過債息高企始終對高增長股有影響，重點係呢批股份基本因素無變，維持到高增長兼要市場願意付出高溢價估值，咁呢批股份又唔係咁就玩完。只係大家要接受高增長股，未必會再好似之前咁升得咁爽，尤其近日北水只顧炒作A股，南向流入資金大減，少咗呢批有錢就任性嘅北水基金豪氣掃貨，高增長股短期都係有波幅，難有大升幅。
不過聯儲局明確表示維持寛鬆貨幣政策至2023年，隔晚道指跟標指均創收市新高，恒指今早隨之高開。恒指高開283點報29317，係半日低位，高開高走，愈升愈有，成功收復50日線 (29265)，升幅再度擴大，再收復20日線(29391)，最多升562點，高見29596點，為3月4日以來高位。恒指中午報29472，升438點；國企指數半日收報11508，升149點；恒生科指收報8752，升178點。大市半日成交額993.97億元，又唔算特別多，始終北水已唔似得上兩個月咁積極，真係要等下一季，北水再作部署及加重配置港股，成交額先有望回升。
ATM為今日升市領頭羊，阿里(09988)升5.9%，騰訊升3.2%，美團升5%，已為恒指貢獻逾半升幅達251點。小米(01810)暫停咗美國對其進一步制裁，暫時擺脫弱勢，半日再升1.7%，之前25阻力變為支持，唔少大行仍繼續唱好，持有嘅朋友可以放下心頭大石。其他藍籌普遍回升，但石藥(01093)之前威咗幾日，今日逆市跌2%，係表現最差藍籌。
餐飲股今日表現唔錯，整個板塊做好，海底撈(06862)最勁半日升7.6%，呢隻由80樓上回到落去60邊，估值已屆合理吸引水平，呢啲位持貨有數圍，升得穿62企穩條100日線，要重上65-68元唔難。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。