大笨象季績超市場預期
美股上周個別發展，雖然鮑爺已改口風，唔再堅持通脹只屬短暫問題的觀點，更警告供應鏈受限及通脹壓力可能延續至明年，該局正處於就業未達標但物價超標嘅兩難局面，不諱言係時候減少放水，若通脹持續上升「肯定會出手」。不過正正因為通脹壓力下，令投資者認為要抵抗通脹，就要買股票，美股因此高居不下，更持續走強。而樂觀一派更認為，目前消費需求強勁，全球增長持續加速，供應鏈挑戰對企業收益嘅影響應該可控，尤其係標指成分股中大多數板塊，如金融、互聯網、軟件及醫療保健，整體收入增長有助於抵銷不斷上升的嘅成本壓力，而成本壓力亦可以轉嫁至下游用家。既然如此，之前一直擔心美股隨時爆煲，暫時睇嚟擔心有啲多餘。
不過阿Man一向係股市大好友，即使認同高企嘅美股，喺第四季早段有機會出現較大幅度調整，但對美股中長線仍好。而美股經歷9月中至10月初一輪較為悲觀嘅市場氣氛後，目前投資者又回復樂觀，尤其係標指成份股大部份交出一份亮麗季績，足以平息之前市場嘅憂慮。
港股踏入10月亦一步步回升，雖然北水入場未算積極，但指數24000水平以下回升，唔覺唔覺已升咗超過2000點，成功收復26000水平，呢幾日恒指喺26000水平爭持，漸漸企穩，今早港股低開高走。恒指低開105點，一度跌197點，見25929點半日低位後回勇，一度倒升85點，見26212點半日高位。恒指中午報收26150點，升23點；國指喺內房股走弱下，跌21點，報收9335點；恒科指則升14點，報收6768點。
今日市場焦點當然係大笨象(00005)派成績表，第3季列賬基準除稅前利潤增加23億美元，達到54億美元，大幅好過市場預期。若撇除貨幣換算差額及重大項目等一次性因素，經調整除稅前盈利按年升36.33%，至59.96億美元；純利按年升1.6倍，至35.43億美元。另外，集團計劃斥資最多20億美元回購股份，呢個回購金額亦係市場預估上限，估計大笨象午後會因為呢份業績而抽升，暫時阻力仍然係48至50元。有貨嘅睇主食糊，無貨唔建議高追。
大型科網股別發展，美團(03690)、阿里(09988)跟小米(01810)半日升唔夠1%，反而騰訊(00700)半日跌0.7%，限制咗大市升幅。其他藍籌股以比亞迪(01211)表現突出，再創上市新高305元，半日報收302.8元，升2.5%，有貨可以用300元止賺持有先，如果落返300元樓下，待調整至270至280元再考慮撈返。要數表現最差成份股一定係海底撈(06862)，半日跌近8%，股價相當貼地，又去返26水平呢啲低位，小心隨時再穿底。至於表現最好係藥明生物(02269)，半日升逾4%，但留意120元阻力唔細。
內地落實推房產稅，先喺幾個地方做試點，口痕友話勢掀掟貨潮，內房股普遍受壓，半日跌幅由超過2%至6%不等。雖然恒大(03333)上周傳出償還9月到期嘅債息，但債務問題一日未解決，都係一個計時炸彈。至於其他內房股又受到政策監管影響，睇嚟內房股暫時都係有波幅，冇升幅。
港華燃氣(01083)半日急升逾14%後停牌，除咗私有化都諗唔到有乜其他勁嘢公布，不過冇貨都唔使恨，若果真係私有化，公布完個私有化價格都唔會追得切貨，純食花生。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。