失守多條平均線 港股低處未算低
預咗美國債務上限問題，唔到6月1日死線大限都唔會有結果，兩黨為咗爭取最大政治籌碼，必定去到最後一刻先會達成協議，死線之前雙方唔會肯讓步。受呢個問題困擾，美股借勢回吐，隔晚三大指數下跌，拖咗個ADR同夜期落去，再加上今早人民幣創半年新低，港股跟埋A股齊齊下跌，恒指跌至兩個月低位。
恒指低開151點，跌幅一度收窄至127點，見19304半日高位，但人仔走弱，港股沽壓更大，半日最多跌274點，見19158半日低位，更跌至兩固月新低。恒指半日跌183點，報收19248；國指報收6532，跌71點，恒科指半日跌45點，報收3811。半日成交額只有442.31億元，市況持續淡靜。
藍籌股普遍走軟，友邦(01299)、大笨象(00005)跟港交所全線向下，跌幅少過1%，但內地金融股內銀跟內險股就跌幅較大，全部跌超過1%。今日派成績表嘅聯想(00992)半日跌3.7%，業績前未見炒上，有別於科網股業績前又引人落搭。海底撈(06862)半日跌近半成，為表現最差藍籌股；相反表現最好嘅信義光能(00968)半日升3.6%。
科網股全線向下，除咗公布業績前已炒起嘅快手(01024)，半日仍維持升幅，只係今日都開始唔係好炒得郁，之前兩日升咁多，業績後無見光死都算係咁。AMTJB全線向下，全部跌幅超過1%，小米(01810)業績前炒唔起，今日將公布業績，股價半日跌1.7%。呢期內地嘅雲服務收費相繼減價，金山雲(03896)公布業績虧損擴大，面對未來服務或要減價以搶佔市場，真係唔知幾時可以扭虧為盈，股價半日插水8.1%。
人仔持續走勢，對人民幣匯價敏感嘅內房股連日插水，中國海外(00688)跌足九個交易日，半日再跌2.1%。其他內房股全線下跌，跌幅由不足1%至近半成不等。除咗內房股，濠賭股亦見沽壓，人民幣走軟對佢哋嚟講當然非好事，內地客仔身家縮水，濠賭股生意難撈，整個板塊今日走軟，跌幅閒閒地超過3%至近半成不等。
港股已失守多條移動平均線，持續向下尋底係意料中事，今個星期又長周末，下周二期指結算，大市呢一刻隊到咁低，似乎淡友想喺呢個月贏到盡。不過一旦五窮過後再六絕，咁就低處未算低，始終失守咗19400-19500呢啲大位，都好大機會下試18800至19000，有心買貨唔使急，睇返家下嘅成交，大戶都仲未肯入場撈貨，我哋一般散戶亦無急要做先頭部隊。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。