好淡爭持未宜進取掃貨
美股隔晚表現唔錯，雖然債息未見回落，但唔再急升，美國10年債息傾向穩定喺1.6厘水平，美股開始習慣一個較高水平，而高增長股經過一輪殺估值後，再次浮現吸引力，美股三大指數隔晚做好，道指再創新高，但市場關注聯儲局本周議息會議，有否反映未來息率走勢嘅啟示，加上中美高層戰略對話，港股呢邊嘅缸邊友未敢輕舉妄動，令港股半日交投淡靜，半日只有828億元，恒指目前喺二萬九水平爭持。
恒指高開203點，報29036點，但A股一度倒跌，拖累港股升幅收窄至38點，見28872半日低位。不過，A股回勇，港股重拾動力，半日升逾百點收市，可惜未能企穩10天線收市(29040)，暫時二萬九水平爭持。恒指半日報收29012，升179點；國企指數半日收造11316，升172點；恒科指報收8492，升227點。
科技股捱打完一輪，殺估值暫告一段落，而持貨能力不足嘅散仔，大槓桿操作嘅炒鬼，要打靶斬倉都走得七七八八，大部份科技股已於上周成功尋底，目前開始築底整固，但由於上面囤積唔少蟹貨，要回勇再展升浪需時。一如阿Man所料，28000左右嘅港股已有支持，而科技股亦喺上周見咗底，但3月餘下時間可能都係上落市，好似今日咁嘅情況，有貨可以keep，無貨打死唔會追。JATMX之中，以小米(01810)今日表現最好，暫時解除禁投威脅，股價重上26元企穩，下一阻力喺28-30，留意26元要守穩，否則難以更上一層樓。
傳統藍籌股以創科(00669)半日創新高表現較標青，之前插到嘴歪嘅藥明生物(02269)今日回升5.8%，有貨無論平貴都keep住先，貴貨捱過低位，好股唔怕持有。其他藍籌股暫時吸引唔到阿Man眼球，始終高增長股先係阿Man啱飲嘅茶。
今日暫時似乎無乜好做，皆因玩開嘅科技股反彈，反而係揸重貨嘅缸邊友，要好好考慮有冇需要減減倉，目前仍然係好淡爭持，唔排除債息稍為挾高至接近1.7水平，又引起市場不安，屆時剛成功尋底嘅新經濟股，高增長股，隨時又成為提款對象，畀大戶當係ETC咁襟。總之呢段時間，反彈升市唔追貨，急跌無倉可撈貨，今日咁嘅情況，有糊食糊，無糊咪食住花生先囉。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。