好淡爭持等待更佳入場位置
日本央行噚日突然宣布擴闊利息波幅上限至0.5%，雖然唔係正式加息，但足以刺激日圓急升，因為咁係意味住長久以來極度寛鬆嘅日圓政策已調節，唔排除明年加息。留意目前日本政府仍有買債，但若然繼續緊縮，有可能停止買債，一旦縮表收水，對金融市場定必帶嚟震盪。日央行調整貨幣政策，不僅刺激日圓急升，同時亦推動美10年債息由3.5%回升至3.7%，美股隔晚一度走軟，但其後轉跌為升。本來日本一直係借貸成本至低嘅國家，日本開始調整貨幣政策，難免令全球借貸成本上升，對股市嚟講並非好事。
港股連跌兩日後，今早曾嘗試反彈，不過假期前夕，市場氣氛相當淡靜，無乜資金入場下，反彈亦有心無力，目前係好淡爭持。恒指高開96點，最多升160點見19255半日高位。不過A股疲軟，港股亦曾由升轉跌，曾倒跌27點，見19066半日低位。中午恒指報收19112，升17點；國指報收6480，升8點；恒科指報收4007，半日升10點。半日成交額勁縮水，只有386.22億元，唔少缸邊友已提早收爐，準備放聖誕節長假。
藍籌股個別發展，大笨象(00005)半日升1.6%；相反友邦(01299)繼續腳軟，半日跌0.7%。ATMJ乏善可陣，騰訊(00700)跟阿里(09988)半日分別升0.5%及0.7%，無甚睇頭，但都好過京東(09618)郁都唔郁無起跌，美團(03690)仲要跌1%。其他藍籌股都係靜靜局局，睇款都係提早收爐。
不過金礦股喺金價重越1800美元水平下做好，整個板塊嘅股份，除咗山東黃金(01787)僅升0.8%，其他金礦股升1.2%至3.2%不等。只係成交都唔多似樣，又係得個睇字。Nike 上季度業績好過預期，帶動相關概念股上升，當中申洲(02313)半日升6.8%，藍籌之中表現最好。裕元(00551)漲1.9%；滔搏(06110)揚2.4%；中國動向(03818)升1.6%，但係無乜成交，又係得個睇字。
有大行將iPhone12月銷量預測下調，手機設備腳軟，舜宇(02382)半日跌2.4%；其他手設股普遍跌1%或以上，只有比亞迪電子(00285)半日升1.3%。同樣係比亞迪系，做車嘅比亞迪(01211)半日跌2%，又重返200元樓下，主要係喺美股嘅電電車龍頭Tsela表現每況愈下，連跌三日唔在講，隔晚更急跌逾8%，拖累電車股及相關產業鏈股份下跌。
半日成交縮到400億都唔，個個提早收爐，基本上呢兩日港股都收得工，加上喺19000水平樓上，阿Man都講過值博率大減，寧願靜待機會，等一個更佳切入點，阿Man係會等大市回落至20日線甚至100日線水平，先考慮再入場買貨。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。